Wat is die beste dubbelbatterystelsel vir jou 4x4?
Die 4x4-reismark het geen tekort aan vuurwarm debatte en vergelykende toetse nie. Jy kry toetse wat voertuie vergelyk, bande teen mekaar opweeg, veringstelsels evalueer, en yskaste en wenasse met hulle mededingers vergelyk. Daar is selfs toetse om te sien
Mense wil nou maar eenmaal graag weet wat die “beste” is. Tog is daar een onderwerp wat die meeste 4x4-ryers vermy, en dit is batterye en verdeelherlaaistelsels.
WAAROM IS HIERDIE ONDERWERP OMSTREDE?
Dit gaan hoofsaaklik oor die verskille in voertuigsoorte, alternators, die plek waar die battery geïnstalleer word, kragbehoeftes en natuurlik die verskille in tyd op die pad en die afstande wat mense aflê. Daar is soveel dinge wat in ag geneem moet word dat dit feitlik onmoontlik is om te verklaar dié dubbelbatterystelsel werk beter as daardie een. National Luna het ’n ruk terug ’n artikel gepubliseer oor die redes waarom dit die maatskappy so lank geneem het om sy GS-GS-dubbelbatterystelsel te ontwikkel – die staatmaker-solenoïedtoerusting doen immers al 22 jaar sy ding. Die rede is eenvoudig: Ons was nie oortuig die GS-GS-stelsel lewer beter verrigting as die solenoïedstelsel nie. Daarom het ons etlike dubbelbatterystelsels en batterye saam in die laboratorium getoets om te sien watter kombinasie “die beste” vaar. Maar pleks van ’n klinkklare uitslag het die toetse net gewys hoe ingewikkeld die saak is. Die volgende grafieke en sketse wys wat ons bevindings is oor watter solenoïedstelsel die beste werk en wanneer ’n GS-GS-stelsel beter sal wees.
DIE SOLENOÏEDTOETS
Die toetse het getoon in sommige gevalle waar jou ryding se alternator konstant ’n uitset van 13,9V of meer lewer, sal ’n GS-GS-stelsel (20-25A) jou herlaaiproses stadiger maak. Bó 13,9V – binne die eerste paar uur wat jy
ry – presteer die solenoïedstelsel beter as enige 20-25A-GS-GS-herlaaier op die mark, ongeag die tipe battery in gebruik. Dit sal die GS-GS-stelsel egter steeds meer as vyf uur op die pad neem om die battery 100% te laai. Dit verklaar hoekom die meeste dubbelbatterystelsels so goed werk in die eerste jaar, maar mettertyd dan stoom verloor. Die battery gaan agteruit elke keer as dit net deels herlaai word. Dit is veral die geval met natselbatterye. Daarom word sterk aanbeveel dat jy ná jou reis ’n intelligente instandhoudingsherlaaier gebruik. Baie mense glo verkeerdelik die paar uur wat hulle huis toe ry, is genoeg om die ekstra battery te herlaai. Die battery sal verder herlaai moet word sodat dit 100% herlaai is en veilig gebêre kan word.
GS-GS-TOETS
Die grafika hiernaas beklemtoon die ooglopende voordeel van ’n GS-GS-stelsel sodra die alternator se lewering minder as 13,5V is. Hoewel die solenoïedstelsel steeds in die eerste twee uur beter presteer as die GS-GS-stelsel, sal jy sien die solenoïed kan selfs ná agt uur glad nie die battery 100% herlaai nie. Die beste wat hy kan doen, is 86%. Sodra jy verby die tweeuurmerk beweeg, vaar die GS-GS-stelsel beter as die solenoïedstelsel. Verder is GS-GS-stelsels hittesensitief. As die temperatuur in die enjinruimte 50 ºC of hoër bereik (’n normale temperatuur onder ’n enjinkap), sny sommige GS-GS-stelsels uit. Dit is hoekom dit dikwels beter is om ’n ekstra battery en GS-GS-stelsel in jou bagasiebak te installeer – weg van die hitte. Solenoïedstelsels het nie daardie probleem nie.
TER OPSOMMING
As jou voertuig se alternator deurgaans 13,9V of meer krag lewer, is ’n solenoïed skakelaar die beste opsie vir jou. Maar as jou voertuig konstant minder as dit lewer, is ’n GS-GS-herlaaier ’n beter keuse. Ongeag watter dubbelbatterystelsel jy kies, gebruik altyd ’n intelligente instandhoudingsherlaaier om die ekstra battery 100% te herlaai ná jou reis. Afgesien van die 13,9V-drempel toon toetse daar is ’n toenemende aanvraag na GS-GS-herlaaiers in die voertuigmark vanweë alternators wat wisselende volts lewer.
TEN SLOTTE
Uiteraard sal die bevindings van die toetse aansienlik verander as jy ’n 40A-GS-GS-herlaaier gebruik. Daarom sal National Luna later ’n artikel publiseer wat die herlaai verrigting van ’n 25A-GS-GS-herlaaier met dié van National Luna se nuwe 40A-GS-GS-stelsel vergelyk. National Luna is ’n Suid-Afrikaanse ondernerming wat al 33 jaar bestaan. Die maatskappy lewer die grootste verskeidenheid kommersieel beskikbare 12V-ys-vrieskaste ter wêreld, en versprei sy meer as 200 buiteleweprodukte reg oor die wêreld.