Ry óp die tafel
Skaars twee uur se ry van Kaapstad af kan jy op een van die voorste veldryroetes in die Wes-Kaap kom speel.
Klein Tafelberg-4x4 is geleë op ’n plaas naby Redelinghuys – omliggende dorpe sluit in Velddrif, Aurora en Elandsbaai. Die roete en kampterrein is ontwikkel deur die eienaar, Stephen Burger, maar word deur sy bure Alfie en Gezie Louw bestuur. Met die aankomslag is daar ’n kort en kragtige inligtingsessie waar jy ook jou tweerigtingradio kry. Geen alkoholiese verversings word op die roete toegelaat nie en by elke hindernis moet elke voertuig wag tot hy deur die gids geroep word. Normale konvooireëls geld ook, en daarom wag jy by elke kruising of afdraai vir die voertuig agter jou.
DIE EERSTE HINDERNIS
heet Milkshake, wat kort ná die begin oor jou pad kom. Jy ry eers ’n paar draaie deur die sand en wag dan vir die gids om deur ’n klomp skerp draaie tot bo-op die heuwel te ry. Die gids roep die eerste voertuig en dié skop boë sand om die skerp draaie op soos hy vorder. Dit lyk of hy dit gaan maak, maar dan staan hy stil, die enjin grom nog ’n keer of wat, en uiteindelik blaas hy die aftog al die pad tot onder. Dan kom dit oor die radio: “Wat is jou banddruk en in watter rat was jy? Stoot maar terug tot waar jy begin het.” Daar word vasgestel die banddruk het van die ontvangskantoor tot hier met 0,2 bar opgegaan – dis die warm son. Nadat die sakie reggestel is, volg hy met die tweede poging sonder probleme tot bo. Elke voertuig word dus sommer by die eerste hindernis al ordentlik getoets.
Van hier af vorder jy tot by die volgende hindernis. Dié is nuut en moet nog gedoop word, maar voorlopig word dit Klein Heartbreak Hill genoem. Dit is ’n steil bult in die sand met ’n skerp draai onder wat jou snelheid én momentum beperk. As jy spoed en momentum kan behou, is dit relatief maklik, maar indien nie, moet jy weer onder begin. Ná jou derde mislukte poging moet jy die ontsnaproete neem. Dit is nie iets om oor skaam te wees nie – ’n mens moet êrens begin om jou en jou voertuig se vermoë te ken. >