’n Ford vir die familie
Voorheen het hy hulle 1980-model Gypsey Caravette 5 met ’n Isuzu KB gesleep, maar sedert hy drie jaar terug ’n Ford Ranger aangeskaf het, is die lewe ’n lied, sê Clint Morris van Durbanville.
Ek het sewe jaar lank met ’n 2003model Isuzu KB 300 TDI-4x2dubbelkajuitbakkie gery, maar hy het onklaar geraak en ek het besef dis nie die moeite óf geld werd om hom te laat regmaak nie. Ek het besluit die tyd is ryp vir ’n nuwe ryding.
’n Bakkie is altyd nuttig wanneer jy gaan kamp, ongeag of jy sleep of nie. Ons sleep wel, maar ek laai die meeste van ons bagasie agterin die bakkie en nié in die wa nie. Ek hou ook van selfdoenprojekte en om aktief te wees saam met my kinders. As daar dus nie ’n kruiwa en sakke sement agterop die bakkie is nie, is dit my kinders se fietse.
Ek was dus van die begin af op soek na ’n bakkie, veral oor die veiligheid, betroubaarheid, gemak en veelsydigheid daarvan. Ek het na twee sportnutse ook gekyk, maar omdat ek so lank al ’n bakkie gebruik, het ek geweet ek sal weer een koop.
Uiteindelik het ek in Januarie 2017 ’n nuwe Ford Ranger 2.2 TDCi-dubbelkajuitbakkie (4x2 met ’n handratkas) vir R333 000 gekoop. Die bakkie is net ’n plesier. Ek het al bakkies van ander vervaardigers besit, maar jy gaan sukkel om my voortaan in enigiets anders as ’n Ford te kry.
Ek moet darem erken ek sou dadelik vir my ’n Mercedes-Benz G-klas aanskaf as ek die geld gehad het. Dit is nou wel nie ’n bakkie nie, maar ek sal dan vir my ’n sleepwa kry om die ekstra pakplek te kry waarvan ek so baie hou.
Een van die beste eienskappe is dat ek 850 km met ’n tenk vol diesel kan ry. En hy skrik nie vir harde werk nie. My Ford is nog standaard, maar as ek hom gaan opgradeer, gaan hy eerste ’n stel alleterreinbande kry.
Met 385 Nm wringkrag tot my beskikking maak hy korte mette daarvan om my Gypsey Caravette (van 670 kg) te sleep. Die beste van alles is dat daar nie ’n noemenswaardige toename in brandstofverbruik is nie en ek kan steeds amper 750 km met ’n vol tenk haal wanneer ek sleep.
Vloedbos naby Caledon is ons gunstelingbestemming omdat dit gemik is op gesinne. Boonop is daar baie om die kinders besig te hou by die oord. Dit is in private besit en ’n mens kan sien hulle ontsien geen geld of moeite om elke ding op sy plek te hou en seker te maak almal wat daar kamp, hou by die oordreëls nie.
Ons het nog nie ’n enkele slegte ervaring daar gehad nie.
Trouens, ons is só gaande oor die plek, ons ry soms van Durbanville af Vloedbos toe om die dag daar deur te bring.
Een van die beste eienskappe is dat ek 850 km met ’n tenk vol diesel kan ry. En hy skrik nie vir harde werk nie.