Berei voor vir ’n landsreis

Hier is die belangrikste vyf dinge wat jy moet aanskaf vóór jy vertrek op ’n epiese reis deur ons buurlande.

Een van die algemeenste vrae wat groentjies op 4x4forums vra, is watter toerusting hulle eerste moet aanskaf vir ’n landsreis.

Ons het op die 4x4 Community-forum en die Nissan Patrol-forum gaan kuier om te lees watter soort wyshede die gesoute avonturiers met minder ervare forumlede deel.

Ons het ook ons Facebook-vriende gevra en dit blyk dat buiten ’n goeie tent, kampmeubels en ’n ellelange lys van gereedskap, jy beslis die volgende moet aanskaf vir jou toer.

1Maak keel nat

Water is die allerbelangrikste oorweging wanneer jy in Afrika reis.

Jy moet gemiddeld 2 ℓ water per dag drink om gesond te bly en daarom moet jy ’n watertenk neem wat genoeg water hou vir almal in jou voertuig vir die aantal dae tot jy weer by ’n plek uitkom waar jy die tenk kan hervul.

“Gebruik ’n klein 12 Vdompelpomp om die water uit te kry.” – jelo, 4x4community.co.za

Jy moet op enige gegewe oomblik vyf dae se kos en water by jou hê.

– Engel, 4x4community.co.za

2Bly koel

Dit gons op internetforums as daar oor ys-vrieskaste gesels word.

Sommige forumlede verkies sekere handelsname bo ander, maar oor een ding is daar eenstemmigheid: As jy vir langer as drie dae reis, moet jy die koelboks los en eerder ’n ys-vrieskas aanskaf.

Jy moet natuurlik ook ’n dubbelbatterystelsel in jou ryding laat aanbring.

“Dag twee sal altyd onthou word vir sy lou drankies.” – Elders, 4x4community.co.za

3Hulp van bo

’n GPS-toestel vervang nie ’n kaartboek nie, maar sy satelliete kan jou lei tot presies waar jy moet wees én jy kan jou spoor elektronies opneem sodat jy dit met ander reisigers kan deel.

Ry & Sleep kan beswaarlik klaarkom sonder ’n GPS om die agterpaaie van afgeleë bestemmings te navigeer.

“Tracks4Africa werk blykbaar slegs met Garmin.” – Sweetlips, patrol4x4.co.za

4Onder druk

Dit help as jy presies weet wat die lugdruk in jou trokkie se bande is. Op snelweë moet hulle styf wees vir verbeterde lewensduur en brandstofverbruik; in die veld soek jy hulle effens papper; en op tegniese terrein heelwat papper. ’n Bandrukmonitor hou jou op die hoogte en waarsku jou as ’n band lek.

“Banddrukmonitor. Jy verloor ’n band nou!” – Danie Malan, Facebook

5Pak jou goed

Die binneruim van ’n voertuig kan in ’n kits in ’n chaos verval as jy kampgoed toelaat om vrylik rond te rol, en daarom is kratte onontbeerlike items.

Ammunisiekratte werk lekker want hulle is reghoekig en vermors dus min ruimte. Pak die swaar kratte binne jou trokkie en die ligter kratte op die dakrak.

“Sien voor jou geestesoog hoe jy kamp gaan opslaan – dit sal bepaal wat jy waar pak.” – James, patrol4x4.co.za