Wat hoort in jou noodhulptassie?
Jy kan nie sonder ’n basiese noodhulpstel gaan kamp nie. Ons het met Ryan Harrison, ’n paramedikus, gesels oor wat alles daarin moet wees. BURNSHIELD
Dit is ’n hidrojel wat die pyn van ’n brandwond behandel en die genesingsproses vroeg begin. Moenie petroleumjellie soos Vaseline op brandwonde gebruik nie omdat dit ’n olierige middel is wat die sweetgaatjies laat verstop en die vel verhinder om asem te haal. Burnshield is ook beskikbaar as ’n wondbedekking. TRAUMAVERBANDE EN -DOEKIES, EN STERIELE GAAS
Moenie jou oor watte bekommer nie, want dit is nie waarmee jy ’n wond moet skoonmaak nie – stukkies daarvan kan losskeur en in die wond agterbly, wat dan ontsteking veroorsaak. Steriele gaas en ’n traumadoekie stop die bloeding en help ook die bloed verdik. En dít is presies wat jy wil hê om erge bloeding te keer. HANDSKOENE
As jy dit kan bekostig, probeer van die dikker chirurgiese handskoene kry, sê Ryan.
“Dit help om jou en die slagoffer teen die oordrag van kieme te beskerm. Die alledaagse latekshandskoene skeur maklik.” KNELVERBAND (TOERNIKET)
In ’n noodgeval kan jy met ’n belt en stok jou eie een prakseer, maar ’n ordentlike toerniket bly noodsaaklik in jou noodhulpstel, sê Ryan. As daar erge bloedverlies is, kan dit die vloei beperk en dalk ’n lewe red. SKÊR
Nie die soort wat Kleinjan in sy penneblikkie het nie, maar die sogenaamde reddingskêr. Dit is die een met ’n hoek op die lem – hy is sterk genoeg om deur amper enigiets – selfs denim, leer en plastiek – te sny en word ook nie maklik stomp nie. HAARTANGETJIE
’n Haartangetjie (ja, ’n tweezer) kom veral handig te pas wanneer jy iets moet verwyder wat in die vel vassit, soos ’n doring of ’n stukkie glas. Dit is baie veiliger as om met jou hand te probeer. ONTSMETTINGSMIDDEL
’n Antiseptiese vloeistof soos Savlon is ’n moet om wonde te ontsmet. Vir kleiner skrape en snyplekke kan jy ook ’n soutoplossing gebruik. SPALK
Wanneer jy met ’n gebreekte arm of been te doen het, help ’n spalk om die ledemaat te stabiliseer totdat die pasiënt mediese aandag kan kry.
Ons het ook met Johan Marais, die uitvoerende hoof van die Afrika-Slangbytinstituut, gesels en hy beveel die volgende twee noodsaaklike items aan. DRUKVERBAND
Dit is ’n spesiale soort verband wat help keer dat slanggif versprei deur die limfstelsel af te sny. Die verband dui vir die een wat dit aanwend aan hoe om dit styf om te draai. Jy trek die verband tot die driehoeke daarop soos reghoeke lyk, en maak dit dan vas. ASEMMASKER
Johan beveel ’n produk met die handelsnaam Pocket Mask aan. Dit pas oor die slagoffer se neus en mond en seël dig. Jy blaas elk ses sekondes in die masker.