Hoogtepunte van die Vinnige Willemien
Ek en Leone het op die Vinnige Willemien besluit. Op hierdie roete stap jy 85 km in 4 dae (5 nagte). Al die dae is omtrent 20 km lank. Die roete is uitdagend genoeg dat dit lekker oefening is, maar dis nie moeilik nie. Beginners sal dit baasraak. Op die aand voor jou vertrek ontmoet jy die vriendelike mense van Paul Roux en staan Carolise Appels reg met ’n yslike bord kos in die Pink Tricycle-koffiewinkel. Jy slaap die nag in die bekoorlike Dunlingastehuis. Renee kom kuier en bied ’n inligtingsessie aan oor die paar dae wat voorlê. Op dag 1 spring jy by Slabberts weg en stap tussen die kosmosse deur op ’n gruispad wat in die rigting van Tepelkop kronkel (dié blomme is op hulle skouspelagtigste in die herfs). Die aand slaap jy oor in die mooiste “staphut” wat jy nóg gesien het: ’n eg Vrystaatse sandsteenhuis op die plaas Willowdene. Die lasagne wat op die toonbank wag, laat dit soos huis voel. Stapafstand: 20 km. Dag 2 (my gunstelingstapdag) stap jy lank met Castle Rock voor jou, dan langs jou, en uiteindelik agter jou. Dit is onbeskryflik mooi. Teen sowat 17 km kry jy ’n winkeltjie langs die stasie by Sheridan, waar jy snoepgoed kan koop. Dis een van daardie plattelandse winkels waar jy enigiets – van mooi bont shweshwe-lap tot sokkerstewels en blikbekers – kan koop. Wees op die uitkyk vir die “lonely tree” langs die pad. Die laaste 3 km van die dag is taamlik steil, maar die beloning is fantasties. Jy slaap die aand op Uitzicht, wat byna omring word deur die Malutiberg. Uitzicht het ’n lieflike swembad en die kroegman is vriendelik. Hierdie was waarskynlik die mooiste sonsopkoms wat ek nóg gesien het. Stapafstand: 24 km. Op dag 3 voel jy dalk gister se opdraandes tot by Uitzicht aan jou kuite, maar hulle gaan nie veel van ’n ruskans kry nie... Jy moet daardie bult eers weer áf. Teen omtrent 10 km wag daar drie lastige bultjies kort ná mekaar, maar die res van die dag is die pad taamlik gelyk. Jy slaap die aand op die gasteplaas Emden, waar Anzelle en Duncan hulle swembad met pelgrims deel en mooi geriewe in die Melkstal ingerig het. Stapafstand: 20 km. Dag 4 neem jou oor heelwat plaaspaaie – ’n hele paar boere het ingestem dat die pelgrims oor hulle grond mag stap. Die laaste 3 km tot by Malutizicht loop deur die veld, waar jy soms beleefd vir ’n bees moet vra om opsy te staan. Die aand slaap jy op Malutizicht, ’n netjiese selfsorgoord met ’n binnenshuise swembad. Jy bly in ’n eenheid met ’n kaggel in die sitkamer, en vir aandete wag daar ’n braaipak in die kombuis. Die dagbreek is lieflik. Stapafstand: 21 km.