Tuisgemaakte 4x4
Daar is geen beter manier om jou vrye tyd te verwyl as om jou sportnutsvoertuig op te skerp met ’n 4x4-ombouing nie, sê Ludwig Schaffner van Kempton Park.
2008 TOYOTA FORTUNER 3.0 D-4D Ludwig ken elke nuk en gril van sy Fortuner, en ná jare se gebruik as ’n sleepvoertuig in die Extreme 4x4-uitdaging – plus ’n paar maande se wik en weeg – het hy uiteindelik besluit om 4x4-katoeters vas te bout.
Ek het die Fortuner in 2014 as ’n elkedagse ryding vir my vrou aangeskaf. Hy’s die model vóór die ontrimpeling en is destyds geregistreer as ’n kode 2. Ek het net R116 000 betaal vir die kar, maar ’n verdere R29 000 uitgegee aan herstelwerk en nuwe bakverf.
Die Fortuner was aan die begin van 2019 in ’n botsing betrokke en ek het besluit om ’n Onca-voorbuffer en Onca-rotsglystawe te laat aanbring. ’n Vriend besit ’n dienssentrum vir tweedehandse voertuie en hy het ’n 2012 Toyota Hilux 4x4-dubbelkajuitbakkie met handratte gehad wat voorheen deur ’n klankstelselmaatskappy as ’n promosievoertuig gebruik is. Die bedrading is ongelukkig swak gedoen en die Hilux het uitgebrand. Na ’n lang hofgeding tussen die vorige eienaar en sy versekeraar het die Hilux vir ’n jaar en ’n half by my vriend se werkplek gestaan.
Dit is hier waar die pret begin het, want ek het die ratkas, voorste ewenaar en oordraratkas gekoop nadat ek ’n aanbod van slegs R15 000 gemaak het. Ek kon ongelukkig nie die dryfas kry nie, want dié was reeds saam met die enjin verwyder en aan iemand anders verkoop. Aangesien dié soort onderdele redelik gesog is onder plaaslike hitsrenjaers, kon ek my ou ratkas en dryfas vir onderskeidelik R6 500 en R2 500 elk verkoop. Om op die regte voet weg te spring het ek die dienste van my vriend Noel Marks aangevra. Noel se meganiese aanleg sou broodnodig wees om die projek af te handel.
Volgende aan die beurt was ’n splinternuwe koppelaar en ons het die ratkas en oordraratkas laat nagaan vóór ons dit geïnstalleer het. Ek kon ook ’n voorste dryfas en alternator by ’n tweedehandseonderdelehandelaar kry vir slegs R1 000. Nadat ek om en by 10 skrootwerwe besoek het vir onderdele, het ek op ’n agterste dryfas afgekom en R2 000 daarvoor betaal. Dit het ’n verdere R950 gekos om dit te herbou en balanseer.
Ek het ook ’n paar goedjies by die onderdele-en-toebehorewinkel Ultimate 4x4 gekoop, waaronder hefbome en 4x4-afwerkings vir die kajuit.
Ek het lugsakke by die kronkelvere gevoeg, en met die 4x4-opgradering in gedagte het ons skakelaars in die kajuit laat aanbring sodat ek die linker- en regterkantse lugsakke onafhanklik kon beheer. Nou kon ek ook die hele agterstewe oplig as ek teen ’n skuinste moes uitry.
Ek kon daarin slaag om ’n puik transaksie op ’n stel GT Radial Adventuro 285/75 R16modderbande te beklink en die ouens by
Tiger Wheel & Tyre het my gehelp om die vering aan te pas vir die bande.
My brandstofverbruik is hier rondom
15,4 ℓ/100 km (6,5 km/ℓ), maar dis te verwagte wanneer ek swaar goed soos ingevoerde Amerkaanse veldvoertuie sleep. Daai ouens is nie liggewig masjiene nie en daarom het ek vrede gemaak met die brandstofverbuik. Tot dusver loop alles voor die wind, maar omdat dit ’n sleepvoertuig is, kyk ek goed na hom. My Fortuner word elke 7 500 km gediens teenoor die gewone diensperiodes van 15 000 km wat Toyota voorstel.
Daar is so baie klein dingetjies wat in ’n projek soos dié gaan dat ’n mens dit maklik miskyk. Noel het die wielboogskutte verwyder, 30 mm afgesny en dit weer teruggesoldeer. Dié soort werk kos dalk nie geld nie, maar dit vreet vreeslik baie tyd op.
As ek raad kan gee aan enigeen wat só ’n projek oorweeg, is dit die volgende: Moenie oorhaastig wees wanneer jy onderdele koop nie. Neem jou tyd en moenie die eerste, beste onderdeel aanskaf nie. Raadpleeg die internet vir beter keuses en pryse. Jy kan ook hope geld spaar deur jou ou onderdele te verkoop. Ek het byvoorbeeld my Fortuner se oorspronklike sleepstang vir R2 500 geswaai!
Vandat dit maar net ’n saadjie in my kop was – hier rondom September verlede jaar – tot ons begin werk het twee weke vóór die inperkingstyd, het dit nagenoeg twee maande geduur om die Fortuner te kry waar hy vandag is. Volgende op my agenda is om ’n helder bakverfkleur vir my Fortuner Raptor te kies wat voornemende diewe sal afskrik.
Stuur ’n e-pos na rysleep@weg.co.za en vertel ons van jou ry- en sleepding.