Dinge verander
HOns tydskrif se énigste doel is om jou kamp-, 4x4- en reiservaring beter te maak en ons is dankbaar vir jou aandeel in ons bestaan en die pad wat jy saam met ons stap.
ulle sê twee dinge in die lewe is onvermydelik: die dood en Jan Taks wat sy pond vleis eis. Ek glo verandering hoort saam met dié twee, veral in die tye waarin ons leef. En oor verandering het ’n slim mens op ’n keer gesê dít is die enigste onveranderlike waarde. Nêrens is dít meer ooglopend as in die gedrukte media waarin ons by Ry & Sleep ons bevind nie. Teen dié tyd het jy seker al die aankondiging gesien van die sluitings en veranderinge by Media24 se publikasies. Die goeie nuus is dat Ry & Sleep voortgaan, hoewel ons frekwensie gaan verander van ’n maandelikse tydskrif tot een wat elke twee maande verskyn. Die eerste tweemaandelikse tydskrif is ons Oktober-November-uitgawe; dus kan jy volgende maand nog jou September-uitgawe te wagte wees. Hoewel ons voortaan net elke twee maande ’n nuwe uitgawe op die rak sal bring, gaan ons tussendeur ook aan spesiale projekte soos die immergewilde Oordgids, 4x4-gids en Pretboek werk. Dit beteken daar sal dus gereeld een van ons gedrukte publikasies beskikbaar wees. Besluite soos dié is ingrypend en ek kan jou die versekering gee dit is nie ligtelik geneem nie. Die wêreldekonomie is aan skerwe weens die Covid-19-pandemie en die gedrukte media is al geruime tyd onder druk. Daar was vir ons dus geen ander keuse nie as om anders te dink. Aan die redaksionele kant kan ek jou die versekering gee ons het steeds die regte mense én hulpbronne om vir jou Suid-Afrika se voorste kamp- en veldrytydskrif aanmekaar te slaan. Jy gaan nou net ’n bietjie langer vir hom moet wag. Terloops, ons intekenareafdeling sal eersdaags met intekenare in verbinding tree om te verduidelik hoe sake vorentoe gaan werk. Sedert die aankondiging het ons verskeie boodskappe ter ondersteuning ontvang en daarvoor is ons baie dankbaar. Ons tydskrif se énigste doel is om jou kamp-, 4x4- en reiservaring beter te maak en ons is dankbaar vir jou aandeel in ons bestaan en die pad wat jy saam met ons stap. Bly veilig!