Ford se Jeep-vreter
Ford in Amerika het onlangs sy nuwe Bronco bekend gestel en die Yanks is gaande oor hom. Maar waarom is dit vir ons nuus? Die 2021-model Bronco het dieselfde 2.3 EcoBoost-enin en 10 spoed- outomatiese ratkas as die Ford Ranger. Jy kan ’n Bronco dus in Suid-Afrika laat diens as Ford besluit om hom met regterhandstuur beskikbaar te stel. Die Bronco is in der waarheid ’n mengsel van die F150- en Ranger-bakkie.
Die Bronco is ook beskikbaar met die 2.7-V6-EcoBoost-enjin wat uit die F150-bakkie kom en ’n splinternuwe 7 spoed-handratkas (een trurat, vyf ratte vorentoe en een kruiprat met ’n ratverhouding van 95:1).
Wat vering betref, het die Bronco agterlangs ’n Dana 44- vaste as en voorlangs onafhanklike vering, ook deur Dana. Ons is nie so seker of onafhanklike vering die regte besluit was nie, maar as jy kyk hoe die Amerikaners se sogenaamde Trophy Trucks in die Baja-veldrytydren presteer met hulle onafhanklike vering, het Ford dalk ’n punt beet.
Die stabiliseerder op die voorste as kan boonop uit die kajuit ontkoppel word met die druk van ’n knoppie. Die vering stel jou in staat om 35”-bande aan te bring sonder dat enige modifikasies nodig is.
Die oordraratkas kan in die ry van tweewielaandrywing na viertrek oorskakel en daar is opsionele elektriese ewenaarslotte vir die voor- én agteras.
Daar’s sewe ritmodusse wat die lewe vir groentjies makliker gaan maak, maar ervare bestuurders kan die ritmodusse omseil en self beheer neem oor die meganika. Twee funksies waarvan ons veral hou, is die sogenaamde Trail Assist wat jou in staat stel om stadige versnelling en die remme met slegs een voetpedaal te behartig. Dié stelsel sal ook een wiel rem wanneer jy skerp draai sodat die Bronco óm daardie geremde wiel draai, asof dit ’n spilpunt is.
Ford sê hy’t die Bronco ontwerp sodat klante die standaardbuffers en -bakpanele kan vervang met naverkope-onderdele. Ford sê ook jy kan die Bronco binne ’n uur uitmekaarbout tot net sy basiese dop en aandrywingstelsel op die leerraamonderstel oorbly.
Praktiese elemente is waterbestande knoppies in die binneruim, ’n plek op die instrumentepaneel om onder meer >