Lekkerry4x4roetes
Die provinsiale grense is weer oop en dis tyd om ’n lang draai te gaan ry met jou trokkie. Hier is vyf gunstelingroetes binne Suid-Afrika se grense.
Gedurende vlak 2 van die Covid-19-inperkingsmaatreëls mag ons nog nie oor die landsgrense reis nie – maar dit is geen probleem nie, want in Suid-Afrika is immers heelwat te sien. Elkeen van die roetes wat ons hier noem, gaan jou vir langer as net een dag besig hou. Laai dus jou tent of haak jou boswa, en pak genoeg kos in vir ongeveer ’n week.
Let wel, ons het nie die heel uitdagendste roetes in Suid-Afrika gekies nie, hoewel elkeen wel uitdagings bied as jy kans sien om hulle te takel. Anders kan jy hulle bloot omseil.
Ons noem ook vyf belangrike items wat ons jou ten sterkste aanraai om saam te neem. Mooi ry... en neem baie foto’s!
Hierdie roete begin op Barberton en neem jou noordwaarts na die Blyderiviervallei. Die wêreld hier is sinoniem met bosbou en mynbedrywighede, en eersgenoemde beteken natuurlik hier is ’n magdom bosboupaadjies wat deur plantasies vleg.
Mik eers met die R40-streekpad deur die De Kaapvallei tot op Kaapsche Hoop. Vat van daar af dan die gelyknamige pas tot in Nelspruit. Uit Nelspruit volg jy dan die N4-snelweg vir 25 km en draai af op die R539 na die Sudwalagrotte. Ná jou besoek aan die grotte is dit verder noord met die R539, oor die Sudwalapas, tot op Sabie vir ’n vroeë middagete. Hier is pragtige besienswaardighede soos die Lone Creek-, Bridal Veil- en Sabie-waterval.
Jy kan die Mac Mac-4x4-roete takel as jou voertuig daarvoor ingerig is, anders stel ons voor jy bly noord van Sabie vir 8 km op die R532 tot waar jy regs afdraai na die Klipkraalpas wat deur die Blyderiviervallei kronkel. Ry óór die R535streekpad en volg die Laeveldroete deur die Blydepoortravyn tot aan sy bokant naby Green Valley. Van hier af is dit net ’n entjie tot op Hoedspruit en Phalaborwa waar jy kan oornag vóór jy die Krugerwildtuin vroeg die volgende oggend invaar. >