WEET VOOR JY WAAI
Is dit veilig? Hou die nuus dop en maak seker die Goma-gebied word as veilig beskou vir jou beoogde besoek. In tye van ooglopende sekerheidsprobleme sal die park jou laat weet. Hoeveel kos dit? My naweek in die Kongo het uiteindelik altesaam sowat US$1 000 p.p. (sowat R12 770) gekos. Permitte vir berggorillas kos US$400 p.p. (R5 100) en die vulkaanklim US$300 p.p. (R3 830; dit sluit jou hutverblyf in, maar nie kos of die portierdiens nie).
Alle vervoer kos ekstra. Dit is egter nie ’n goeie idee om op jou eie in die Kongo rond te ry nie. Dit kos byvoorbeeld US$94 (R1 200) vir die rit van Goma na die parkkantoor by Bukima (eenrigting). Die park bied ’n pakket wat alles insluit: Hulle kom tel jou op by die grens en vat jou na die verskillende dele van die park.
Jy kan al jou permitte, vervoer en verblyf aanlyn bespreek en betaal: visitvirunga.org Visum Die park reël dit vir jou. Koste: US$105 p.p. (R1 340). Malaria? Ja, tref voorsorg, en kry ook jou geelkoorsdoepa. Waar bly ek? Die park het enkele lodges (kyk op die webwerf), maar dit is goedkoper om by ’n hotel in Goma te oornag. Ek het by Hotel Cap Kivu geslaap teen US$80 (R1 022) p.p., ontbyt ingesluit. Kyk by bookings.com. Moet ek fiks wees? Ja, anders is dit nie lekker nie. Hoe kom ek daar? Ek het na Rwanda gery (sien artikels oor ander dele van my Oos-Afrika-reis in Weg #151, #152 en #153) en daarvandaan die Kongo besoek. Dis makliker om te vlieg – jy kan van Johannesburg direk na Kigali in Rwanda vlieg (retoer: R7 000 p.p.) en dan per taxi na Goma reis. Besoek skyscanner.net Ek wil net gorillas kyk... Dit is makliker om berggorillas te besoek in Rwanda en Uganda. Permitte is duurder as in die Kongo, maar met die ekstra vervoerkoste in die Kongo kos dit omtrent ewe veel. Vir inligting oor Rwanda, sien rwandatourism.com. Uganda: bwindiforestnationalpark.com Dis als hier Hou virunga.org dop vir parknuus en spesiale aanbiedings (van die uitstappies is goedkoper tussen Oktober en Desember). Indien jy gorillabewaring geldelik wil steun of tot die veldwagterfonds wil bydra, kan jy dit hier aanlyn doen.