WEET VOOR JY WAAI
Hoe kom ek daar? Fraserburg is 113 km noordwes van Leeu-Gamka. Draai by Leeu-Gamka af van die N1 en volg die R353 oor die Theekloofpas tot op die dorp. Dit is die enigste teerpad na Fraserburg. Die paaie van Sutherland, Williston, Carnarvon en Loxton af is almal grondpad.
Beste tyd van die jaar? Februarie is bitterwarm. As jy nie omgee vir die koue nie, is Junie en Julie ’n goeie tyd – pak warm klere in! In Augustus is daar dikwels mooi blomme langs die Rantepad op pad na Sutherland.
DOENDINGE Hierdie aktiwiteite kan almal by Marthinus Kruger bespreek word. Kinders betaal halfprys. 084 873 0098; mjkruger99@gmail.com Sterrekyk. Fraserburg is net 110 km van Sutherland af. Soos iemand op die dorp gesê het: “Ons het mos dieselfde sterre bo ons as Sutherland.” Inderdaad. Marthinus kan vir jou beduie waar om naby Nuwedam by ’n veilige plek af te trek. Neem ’n kombers en piekniekmandjie saam en vergaap jou aan die Karoonag en konstellasies. En dis gratis! Geskiedkundige staptoer. Verken Fraserburg te voet saam met Marthinus en besoek plekke soos die oorspronklike Rietfontein-opstal, die Anglikaanse kerk en NG kerk, en ’n paar historiese huise. 1-2 uur; R50 p.p. Besoek die museum. Die ou Pastorie in Voortrekkerstraat is ook die dorpsmuseum. Kom leer meer oor Fraserburg se geskiedenis en die dinovoetspore buite die dorp – hier’s ’n indrukwekkende uitstalling en skaalmodel van die Bradysourus. Marthinus bied toere aan deur die museum en na die replika van die korbeelhuis en die Peperbus. R50 p.p. Bekyk die versteende spore. Ook hier is Marthinus jou gids na die plaas Gansfontein, 3 km buite die dorp. Verbeel jou jy beweeg terug in tyd en plaas jou hand langs die spoor van die magtige Bradysourus, wat 250 miljoen jaar gelede hierlangs geloop het. R100 p.p.; bring jou eie voertuig. Ry die Rantepad. Volg die Rantepadafdraai in die rigting Sutherland buite die dorp en ry al langs die rantjies, verby ’n sterboom en Engelse soldate se grafte. Dis is een van die mooiste paaie in die omgewing. Speel gholf. Slaan af op ’n regte Karoobof. Slegs R10 p.p. Op Saterdagmiddag 12.30 nm. kan jy saam met die plaaslike inwoners afslaan en natuurlik later by die 19de putjie kuier. Wandel in die begraafplaas. Jy kan op jou eie stap of op ’n begeleide staptoer na verskeie grafte van geskiedkundige belang gaan. R50 p.p.
EET HIER Meerkat-restaurant. Dié restaurant van Piet en Mariaan Stassen op die perseel van Fraserburg Kafee in Voortrekkerstraat. Groot spyskaart met onder meer die Meerkat Burger (R30). Smul vir slegs R67 aan ’n bord kookkos met malvapoeding, filterkoffie én vrugtesap! Kontak 023 741 1180.
Die Pers Malva. ’n Koffie- en geskenkwinkel by Cillierstraat 20. Die cappuccino (R18) is eersteklas. Lê weg aan ’n springbokpastei (R42) en eet iets soets vir nagereg – die rooifluweelkoek (R25) is ’n wenner. En as jy om een of ander rede ’n dokument moet uitdruk, kan die eienaar, Dirk van Schalkwyk, jou daarmee help. Kontak 023 741 1099
BLY HIER Die Kliphuis Dié gebou dateer uit die 1850’s en is aanvanklik as ’n meule gebruik. Hier is en suite-dubbelkamers. Waar? Voortrekkerstraat 5. Koste Kamp R100 p.p.; dubbelkamer vanaf R395 p.p. wat deel. (ontbyt ingesluit). Aandete vanaf R85 p.p. Kontak 023 741 1870
kliphuisfraserburg.co.za
Eselfontein-gasteplaas ’n Plaashuis op ’n skaapplaas. Hier is drie slaapkamers en ’n toegeruste kombuis. Swembad, Aga-stoof en binne- en buitebraai. Waar? 30 km buite Fraserburg langs die Rantepad, rigting Sutherland. Koste Vanaf R250 p.p. Kontak 084 873 0098 (Marius)