CHEERIO GARDENS, HAENERTSBURG
Enige “amptelike” tuin is heeljaar ’n besoek werd. Maar in die lente is dié tuin die blomweergawe van vuurwerk op Nuwejaar! Om elke hoek ontplof nóg ’n boom of struik in kleurryke bloeisels: Rooi, oranje, pers, wit en elke denkbare skakering van pienk!
Sylvia Thompson, ’n eksentrieke plantentoesias, het die tuin in 1946 begin en 30 jaar lank versorg. Sy het onder meer sade gekry van Kew Gardens in Engeland én die dokter van die Japanse keiser het vir haar sade van skaars asaleas en kersiebome gestuur. Ander plante wat ook hulle Sondagklere dra, sluit in irisse, vingerhoedjies en krismisrose. Kom stap op voetpaadjies of sit rustig op ’n bankie onder ’n houtappelboom. Waar? 4 km verby Haenertsburg op pad na Tzaneen op die R71. Draai af na die Cheeriovallei. Jy kan nie die naamborde miskyk nie. Koste Toegang is gratis, maar R30 p.p. in seisoentyd (September en Oktober). Die tuin is heeljaar oop en elke seisoen het sy eie bekoring, soos die rooi en oranje kleure tydens herfs. Oop Daagliks van 9 vm.-5 nm. Ek is honger? In September en Oktober is The Deli and Coffee Shop elke dag oop, en die res van die jaar van Donderdag tot Sondag. Kontak 083 355 0835; cheeriogardens.co.za Lentefees Van 23 September tot 1 Oktober hou Haenertsburg lentefees. Dan is hier allerhande stalletjies en musiek op die dorp en by die Magoebaskloof-hotel. Kontak 073 216 9912 (Liesl)