Weg se wêreld is aan ’t verander
Die Griekse filosoof Heraklitus het 2 500 jaar gelede al gesê: “Die enigste konstante ding in die lewe is verandering.” In Heraklitus se dae het daai verandering teen die spoed van ’n gletser voortgekruip, maar vandag is dit ’n passasier op een van Elon Musk se ruimteskepe.
Die grootste uitdaging van enige moderne sakeonderneming is nie ’n nuwe belastingkoers wat deur ’n windbol in ’n blink pak aangekondig word nie, maar hoe om aan te pas by snelle tegnologiese vooruitgang. Dink net hoe iets soos die digitale revolusie ons lewens die afgelope jare verander het, en hoe baie dit nog gaan verander. Dis een van die redes hoekom Weg lankal nie meer net ’n tydskrif is nie. Ons maak televisieprogramme (Toast Coetzer en Sophia van Taak het pas die derde reeks van Weg Agterpaaie langs die Weskus geskiet), ons bied lesertoere, werkswinkels en kampnaweke aan, meer as 100 000 mense reis saam met ons op sosiale netwerke soos Facebook, Instagram en Twitter, en ons woeker op webwerwe.
En natuurlik takel ons heeltyd nuwe dinge, want as ons stilstaan, verdwyn daai ruimteskip sonder ons die heelal in. Dit is dus met trots dat ons twee groot ontwikkelings in ons wêreld aankondig. Die een is ons nuwe potgooi (!) – podcast – met die titel Weg Stories waar ons eie skrywers van hulle beste rubrieke en reisstories in Afrikaans voorlees. Die sukses hiervan het ons stoutste verwagtinge oortref. Ons was binne die eerste week die tweede mees geluisterde podcast in Suid-Afrika! ’n Nuwe podcast- episode word elke tweede week gratis op ons webwerf en op iTunes uitgereik. Gaan luister ’seblief en laat weet wat julle hiervan dink.
Die ander groot nuus is dat Weg en ons sustertydskrif Weg Ry & Sleep saam met van die land se voorste Afrikaanse tydskrifte soos Landbouweekblad, Finweek, Tuis, Sarie, Kuier, Baba & Kleuter en Huisgenoot deel word van Netwerk24.
As jy daarvan hou om jou tydskrif op papier te lees, verander niks nie. Jy koop soos gewoonlik jou maandelikse tydskrif of jy kry hom in die posbus as jy inteken.
Maar as jy verkies om dit digitaal te geniet, het ons nou ’n digitale tuiste saam met al die bogenoemde tydskrifte, asook die groot Afrikaanse koerante soos Beeld, Die Burger, Volksblad en Rapport – plus 30 gemeenskapskoerante.
Nie net ons webstories nie, maar ook ons unieke tydskrifinhoud – asook ekstra stories – is hier sodat jy dit op jou selfoon, tablet of rekenaar kan lees. Dit kos net R99 per maand om in te teken op Netwerk24 om al die nuus en stories te lees wat deur ons koerante en tydskrifte se joernaliste geskep word. Goeie joernalistiek kos geld, en vir ’n tydskrif soos Weg om te bly voortbestaan, is dit nie iets wat ons gratis kan weggee nie – nie op papier nie, en ook nie in die digitale wêreld nie.
As jy reeds ’n Netwerk24-intekenaar is, kan jy onmiddellik begin lees. En as jy nie is nie, gaan registreer sommer nou vir jou 30 dae gratis proeftydperk. Vul jou besonderhede in op netwerk24.com en word deel van ons nuwe wêreld.
Groete.