Ek het Kavanagh sien jaag
Die “Toe en Nou” oor Philippolis in Weg se November-uitgawe het dadelik my oog gevang. Op die 1939 Chrysler (of Plymouth) se kattebak voor Hattingh se garage staan “FILM CRASH SQUAD KAVANAGH”.
Reg (of Rex) Kavanagh en sy klomp taamlik gehawende motors was ’n bekende groep waaghalse wat deur die Kaapkolonie getoer het. Ek was destyds in 1956 ’n st. 3-kannetjie in die koshuis op Queenstown en ek kan onthou hoe ons seuns met groot oë en bewondering gekyk het hoe die klomp ou motors met ’n dik rookbol wat uit die uitlaatpyp borrel, op twee wiele om die skouterrein jaag. En dan ’n skuins oprit bestorm en bo-oor ’n ander geparkeerde motor spring.
Ek glo nie die twee manne wat langs die motor staan, was inwoners van Philippolis nie. Die man in die pak klere was waarskynlik meneer Kavanagh en die een met die stofjas seker sy bestuurder. Hulle het waarskynlik maar net daar vir brandstof (of herstelwerk) vertoef. Ek skryf na aanleidinng van die “Toe en Nou” oor Philippolis. Op die voorgrond van die Toe-foto staan twee mans by ’n 1937 of 1938 Chrysler. ’n Mens kan aflei dat die advertensie op die motor met die selfversekerde man te doen het – sy een voet is besitlik op die motor se trap. Op die deure lyk dit asof Chrysler Kavanagh se Crash Squad borg.
Kavanagh is ’n Ierse van. Volgens inligting op die internet was Reg Kavanagh ’n vegvlieënier in albei die wêreldoorloë van 1914 en 1939. In die tussenjare was hy die leier van ’n groep waaghalse wat lewensgevaarlike toertjies met vliegtuie en motors in verskeie lande uitgevoer het en dit dan verfilm het. Hulle het onder meer in Suid-Afrika, Amerika, Engeland, Ierland, Nieu-Seeland en veral in Australië opgetree.
Weens die lewensgevaarlike aard van hulle optredes moes die lede onderneem om ongetroud te bly en Reg Kavanagh het uit die groep bedank toe hy in 1940 in Australië verlief geraak het op ’n Switserse ysskaatser. Die troue is egter uitgestel toe hy weer by die Britse koninklike lugmag (RAF) aangesluit het. ’n Mens kan maar net wonder wie die man in die kamerjas op die foto is...