PARKEWEEK Dís wanneer jy moet stokkiesdraai

Trek jou dagboek nader en sit sommer nou ’n dag verlof in vir iewers tussen 10 en 14 September. Dis Erfenismaand en jy kan vir een week ’n gratis draai in al ons nasionale parke (behalwe die Namakwanasionale park) maak! Sit eerder by ’n watergat in die wildtuin of kyk uit oor die Vallei van Verlatenheid in die Kamdeboo- nasionale park as om na jou rekenaarskerm te staar.

As jy in dié week na Kaappunt in die Tafelberg- nasionale park gaan, bespaar jy R147 per volwassene en R76 per kind – dis wat ’n dagbesoeker sonder ’n Wild Card gewoonlik betaal! Of laai die kinders in die motor en gaan kyk na die veldblomme in die Weskus- nasionale park se Postbergdeel. Dié deel is elke jaar net in Augustus en September oop vir besoekers.

Dis die 13de jaar dat Sanparke parkeweek aanbied. Meer as 77 000 mense het verlede jaar in dié week na een van die parke gegaan.

Hoe werk dit? Dagbesoekers met ’n Suid-Afrikaanse ID kry gratis toegang tot die parke. Wanneer? Al die parke hiernaas bied gratis toegang van 10 tot 14 September. Party van die parke sluit ook die naweek (15 en 16 September) in – ons dui dit hier regs aan. Let wel Dit sluit nie verblyf of enige van die aktiwiteite in nie.

Nog inligting Kyk by sanparks.org vir die onderskeie parke se hektye.