STEEK AAN DIE VUUR!

Kos wat in die buitelug gemaak word, proe net ánders – lekkerder – as kos wat jy in die kombuis by die huis maak. Dalk is dit omdat jy weer terugkeer na eenvoudige dinge. Jy maak hout bymekaar en pak dit net reg – eers met fyn houtjies en dan die groter stukke, voordat jy dit met ’n vuurhoutjie aansteek.

As die lig begin kwyn in jou boskamp, kry jy jy ’n gevoel van genoegdoening: Jy is omring deur die natuur en jy het ’n knetterende vuur.

Dit maak nie saak of jy wild gesoek het langs die Olifantsrivier in die wildtuin, of heeldag gery het na ’n geheime kol soos Chilojo Cliffs in Zimbabwe se Gonarezhou- nasionale park nie –jy gaan aan die einde van ’n lang dag ’n hartlike ete wil hê.

Met die regte toerusting is dit kinderspeletjies om in die natuur kos te maak.

Jy soek taai goed, toerusting wat die stampe en stote langs die pad sal oorleef. En jy soek beproefde kampstaatmakers wat die lewe makliker maak, soos ’n sak brikette (wat hulle gewig in goud werd is as vuurmaakhout nie beskikbaar is nie), ’n boksie vuuraanstekers (minder gesukkel, meer vuur!) of selfs ’n gasvuuraansteker as jy regtig jou vaardighede wil wys.

Steek aan die kole en kry die tjops, wors en mielies op die braai – kort voor lank sal jy die middelpunt van belangstelling wees.