IS DIE WATER KOUD?
Die somer is amper hier, wat beteken dis tyd om daai kano af te stof en die kinders se swemvlerkies op te blaas. Hier is die lekkerste plekke vir waterpret in Suid-Afrika.
3 plekke vir adrenalienwatersport Swem op sy tyd is heerlik, maar dalk wil jy vanjaar ’n effens wilder waterperd opsaal en ’n adrenaliensportsoort aanpak?
PUNT IN DIE WIND
Die Kaapse Dokter is nie almal se pêl nie, maar sy een groot voordeel is dat dit die winderige Kaap ’n uitstekende bestemming vir vlieërplankryers ( kite surfers) maak.
Big Bay by Bloubergstrand (net buite die Kaapse middestad) is die tuiste van die jaarlikse internasionale King of the Air-kompetisie, maar die Plaat by Grottostrand in Hermanus, Witsand aan die Breërivier en Langebaan aan die Weskus is ook lekker plekke om dié sportsoort te beoefen.
As jy ’n groentjie is wat graag wil leer, klop aan by Kite Lab ( kitelab. co.za) op Langebaan. Pakkette (wat die leen van toerusting insluit) begin by R2 800 vir ’n tweedagkursus (4 uur per dag). Coastline by Blouberg en Langebaan ( coastlinekitesurfing.com) vra R1 800 vir ’n tweedagkursus.
RY DIE GOLF BY PORT EDWARD
Die Umtamvuna River Lodge het uitstekende geriewe vir verskeie watersportsoorte by die mond van die gelyknamige rivier.
Jy kan al die gewone waterdinge doen: swem, roei, hengel... maar die tropiese weer en die rustige water maak die rivier die topbestemming in die land vir vlieërskaatsers ( wake boarders). ’n Kitsles vir groentjies: By wake boarding is die plankryer met ’n koord aan ’n motorboot vasgemaak.
Van die voorste plankskaatsers van Suid-Afrika en Europa oefen by Umtamvuna. Kevin Dry, Matti Buys en ander topsportlui bied klasse hier aan – van beginner- tot professionele vlak.
Die Umtamvuna River Lodge bied boonop idilliese verblyf en ’n skaatsbaan ( halfpipe) vir “gewone” skaatsplankryers wat op land wil oefen. Gaan na theriverlodge.co.za
ROEI SOOS IN BOTSWANA
Staanroei (stand up paddling, of sommer net as SUP bekend) is een van die watersportsoorte wat die vinnigste groei.
In hierdie sportsoort staan die plankryer regop en roei, amper soos op die mokoro’s op die Okavangodelta. Die gesoute ouens (en vroue) roei in die Kaap by Big Bay by Blouberg, Table View, Drieankerbaai, Kampsbaai en Clifton se Vierde Strand en Vishoek, maar as jy in makker water wil begin, kan jy rondom die Kaapse Waterfront aanklop vir lesse of na Zandvlei naby Muizenberg gaan.
Cabrinha ( cabrinha.co.za) bied lesse by Bloubergstrand aan; of klop by Muizenberg by Surf Emporium ( surfemporium.co.za/sup lessons/) of Cape Sport Center op Langebaan aan ( capesports.co.za).