SOEK DIÉ BLOMME
DAISIES Die beskeie daisy het verskeie
mooi Afrikaanse name: gousblomme, magrietjies, madeliefies en jakkalsblomme.
Hier’s honderde soorte in Namakwaland – soek gerus die katogie (foto: beetle daisy). Die donker vlekkies na-aap en lok byvlieë wat dié blomme bestuif.
SURINGS
Surings is dikwels die eerste blomme van die lente. Hulle is bolplantjies wat in sanderige dele of teen klipkoppies groei met vyf wit, geel of pienk kelkblare. En, ja, surings smaak suur! Die blomme,
blare en bolle is eetbaar en word soms gebruik om geur aan
bredies of sop te gee.
KATSTERT Gaan soek rondom Nieuwoudtville vir katsterte wat soos wit en geel vuurpyle in die veld staan. Daar kan meer as honderd blommetjies wees op een katstert
stingelblom!
VYGIES
Vygies is óral. Wanneer die blommetjies doodgaan, maak vygies ’n “vrug” wat as dit nat is, oopgaan om saad vry te stel. Vygiebosse
soos strandvygies (foto) kom voor van Namakwaland tot by Simonstad, terwyl sandslaai veral in die Kamieskroon
omgewing voorkom.
GEEL KELKIEWYN
Dié blommetjie kom net in Darling se Tienie Versfeldnatuurreservaat voor, van die einde van September tot hier
in die tweede week van Oktober, vandaar die naam
Geissorhiza darlingensis.
BABABOUDJIES
Dis nie net veldblomme wat in die lente blom nie; vetplante pronk ook met hulle blomme – jy moet net mooier soek en ’n bietjie laer buk om hulle wit, geel of pienk blommetjies te sien.