NATUURRESERVATE
Langs die Wildekus is daar nog plekke waar ’n mens van die samelewing kan ontsnap. Hier’s drie natuurreservate waarvan jy waarskynlik nog nie gehoor het nie.
Die Dwesa-Cwebe-, Hluleka- en Silaka-natuurreservaat langs die Wildekus is nog ongerep en die verblyf bekostigbaar – mik hierheen as jy ’n sin vir avontuur en ’n klein begroting het
Sodra ’n mens die Wildekus binnery, verdwyn teerpaaie, vulstasies met Wimpy’s, Woolies Food en hipsters. En die landskap is ewe wild: Groen heuwels strek sover die oog kan sien. Bruin riviere stoot met alle mag seewaarts. En in die valleie tussenin staan oeroue bome in kolle digte inheemse woud. Dít alles forseer die N2 met ’n draai van Oos-Londen af binneland toe voordat dit uiteindelik sowat 530 km later weer kus toe swenk by Port Shepstone. Dit beteken jy kan nie kuslangs reis nie, mits jy ’n 4x4 het, en selfs dít is ’n gedoente en ’n half.
In enige streek is natuurreservate ongerep. Stel jou dus voor hoe afgeleë ’n natuurreservaat aan die Wildekus is!
En ek wil amper nie dié geheim verklap nie: Dis asof inflasie en BTW-goed nog nie die Wildekus bereik het nie. Blyplek in dié natuurreservate is spotgoedkoop – dit wissel tussen R165 p.p.p.n. en R240 p.p.p.n. vir netjiese selfsorghuisies.
Het jy ’n sin vir avontuur en ’n dun beursie? Mik vir die DwesaCwebe-, Hluleka- en Silaka-natuurreservaat langs die Wildekus. Glo my, dié aarde is nóg mooier as op die eerste bladsye van jou Kinderbybel.
HOE KOM EK DAAR?
Kyk, die locals ry natuurlik met enige karretjie hier rond.
In die droë seisoen (winter) behoort jy reg te kom met ’n gewone sedan as jy versigtig ry. Maar ’n voertuig met goeie grondvryhoogte is aan te beveel.
Ry in die reënseisoen (somer) met ’n 4x4 of 4x2 met goeie grondvryhoogte – slaggate is volop en van die steil grondpaaie is dan goed glad.
Laai Tracks4Africa op jou GPS of sorg dat jy Peter Slingsby se Wildekuskaart (R190 by
themaps.co.za) in die mossienes het. >