Wat braai ons vanaand?
Daar is nie altyd plek in die koskrat om ál jou Weg- en KuierKos- tydskrifte saam te karwei nie. Wel, nou kan jy net Kuier om die kole inpak! Aletta Lintvelt, redakteur, vertel...
Hoekom ’n resepteboek? Weg se eerste resepteboek, Naweekkos, het in 2012 verskyn. Ons het gedink dis hoog tyd vir 'n tweede een, wat al Weg se lekkerste en gewildste braai- en potjiekosresepte van die afgelope sewe jaar insluit.
Die grootste uitdaging? Om net 120 uit 800 resepte te kies!
Hoe verskil dié resepteboek van ander in die mark? In die Wegkombuis probeer ons kosmaak sonder te veel moeite en fieterjasies.
Oor die afgelope sewe jaar het daar beslis 'n verskuiwing plaasgevind in hoe ons lesers kosmaak. Winkels het allerhande nuwe bestanddele: Mexikaanse en Oosterse geure is groot nuus en speserye soos gerookte paprika en chipotle-rissies en sriracha-sous maak mense lus om te eksperimenteer. Braaivleis is nog net so gewild soos altyd, maar lesers is op soek na gesonder bykosse.
Weg se resepteboek fokus op vakansiekos: maaltye vir die vakansiehuis se stoep, bykosse vir die bring-en-braai en smaaklike etes om die kampvuur... Met dié boek in jou resepstaander stel jy gou 'n spyskaart saam vir 'n naweek weg waarvoor al jou mense hulle lippe aflek én wat by elke ou se eetplan inpas.
Jou gunstelingresep in die boek? Op bl. 82 wys ons al my gunstelingresepte van Hantamlam-sosaties tot 'n Weskussnoek met 'n sitrussousie... Van watter soort resepte hou Weg- lesers die meeste? Ons lesers kan nie genoeg kry van nuwe planne vir potjieskos, braaimarinades en veral souse vir steak nie. Én dan 'n lekker potbrood!
Geniet jy jou werk? Mense kyk na die mooi foto's en dink die kosspan staan heeldag rond en peusel, maar dis glad nie so ontspannend nie. Ons werk hárd tussen die trollies vol kosaankope, braaivleisrook wat ons oë laat traan en die berg skottelgoed ná die tyd!
Dit is darem ook baie lekker om vir 'n lewe 'n vuur aan te steek en tjops te braai, al ruik jy nou wel na rook aan die einde van die dag!
Ek werk graag saam met fotograwe soos Myburgh du Plessis wat nie omgee om die vleis met die hand om te draai en die kamera met die ander hand vas te hou nie. Daar was al 'n paar noue ontkomings tussen die kamera en die kole, maar gelukkig het ons nog nie enige toerusting aan die vuur afgestaan nie!