Stap die Doringnekstaproete naby Addo
As die olifante wegkruipertjie speel wanneer julle volgende keer in die Addo-olifant- nasionale park kuier, gaan rek bene in die park se Zuurbergdeel.
Die Doringnekstaproete in dié parkdeel is nou 12 km lank – 4 km langer as voorheen – en sal jou nagenoeg vyf uur lank besig hou. Dit gee stappers die kans om nóg dele van die tamaaie Zuurbergreeks te sien.
Vat halfpad langs die roete ’n blaaskans by die piekniekkol en Otto se swempoel. Pak genoeg water, ’n sonhoed en sonbrandroom in – veral wanneer dit warm is.
Wat kan ek langs die roete sien? Die Zuurberggebied sluit vier van die Addo se vyf biome in: fynbos, grasland, woude en subtropiese ruigte (ook bekend as vallei-bosveld). Jy kan ook drie bedreigde broodboomspesies en twee geelhoutspesies sien. Hier is altesame sowat 1 100 plantspesies in die gebied.
Hou jou oë oop vir verskeie bokspesies soos rooihartbeeste en bosbokke, asook bobbejane en dassies.
Hoe werk dit? Die roete begin by die Zuurberg-permitkantoor, waar jy kan parkeer. Dit is ongeveer 30 minute se ry onder meer oor die Zuurbergpas van die Addo-hoofkamp af tot by die permitkantoor.
Julle moet op die laatste om 12 vm. begin stap om betyds terug te wees by julle motor wanneer die hekke om 5.30 nm. toemaak.
Hoe fiks moet ek wees? Jy hoef nie ’n gesoute stapper te wees vir dié staptog nie, hoewel ’n paar taai heuwels naby die einde van die roete wag – matige fiksheid sal goed wees.
Koste Gratis, hoewel jy steeds die park se bewaringstarief moet betaal, tensy jy ’n Wild Card het: R69 (volwassenes); R35 (kinders).
Nog inligting 042 233 8602; sanparks.org