Dis óns wat moes knyp
Op Weg #168 se Brieweblad wonder die Rossouws waar die naam Knyp naby Groblershoop vandaan kom. Kort ná die Tweede Wêreldoorlog koop drie manne met visie, Frans van Zyl, R. L. Barrie en Dawie de Kock al die riviergrond van die plase Winstead, Tsebe, Oranjezicht, Kheis en Rooisand in die Groblershoop-omgewing. Hulle verdeel dit in stukke van sowat 20 ha bewerkbare grond. Hulle ontwikkel alles behalwe Rooisand.
In 1963 koop my pa, Alexander Floris, en ander boere die Rooisandgrond. Die grond was toegegroei met wag-’n-bietjie- en doringbome. Hulle moes alles met die hand uithaal. Pa het al sy spaargeld gebruik om die plaas te koop, en moes geld by die bank leen om die plaas te bewerk. Hy het so gereeld gesê ons moet knyp om deur te kom dat ons later van die plek as Knyp gepraat het. Kort voor lank is die hele gebied in die volksmond Knyp genoem. Ek is die enigste oorlewende van die oorspronklike “Knypers”. Die foto’s is van my pa en ma, Grieta.
J.P. (KOPPE) JORDAAN (74), Groblershoop >