ANCIA DU PLESSIS

van Nylstroom skryf: Ons het in die Kruger op 'n geveg tussen twee geelbekneushoringvoëls afgekom. Die groter voël het die ander een aan die keel beetgekry. Die kleiner een het toe die groter een aan die vlerk gebyt. Waaroor sou hulle baklei?

Die voëlkenner LUKAS NIEMAND antwoord: Ek het aangeklop by dr. Alan Kemp, 'n neushoringvoëlkenner. Die piekniekplekke en ruskampe in die Kruger is belangrike voerplekke vir geelbekneushoringvoëls, veral in die droë seisoen. As dié voëls se gebied piekniekplekke en ruskampe insluit, kondig hulle vroegoggend hulle teenwoordigheid daar aan met hulle kenmerkende tok-tok-tok. Hulle slaap ook naby dié plekke. Dié individue sal dan die piekniekplekke oorheers. Ander individue besoek ook daagliks piekniekplekke (sommige vlieg tot 15 km ver). In dié geval het so 'n besoeker 'n geelbek se gebied betree. Die gevegte kan lei tot ernstige beserings, en soms selfs die dood.