11 HLUHLUWE-IMFOLOZIWILDRESERVAAT

Renosters by dosyne

As jy in Suid-Afrika gewaarborg wil wees om ’n renoster te sien, kan jy mik vir ’n dieretuin of die oudste reservaat in die land: die Hluhluwe-iMfoloziwildreservaat. Maar wie wil nou dieretuin toe gaan?

Daar is renosters in ander parke en reservate, maar in Hluhluwe-iMfolozi loop hulle rond soos beeste langs die N2.

Die R511-teerpad sny die park in die helfte met iMfolozi in die suide en Hluhluwe in die noorde. iMfolozi is witrenosterwêreld. Die samevloeiing van die Wit- en Swart-Imfolozirivier is in dié deel van die park. Die gebied tussen die twee riviere was destyds koning Sjaka se private jagveld.

Tsetsevlieë het ander jagters en boere uit die gebied gehou. Nadat die witrenoster in die 1800’s byna tot uitwissing gejag is, is ’n groep van sowat 500 hier ontdek. Al die witrenosters in die wêreld is nasate van dié spulletjie.

Die meer sosiale witrenosters is grasvreters en verkies die platter landskap van die iMfolozi-deel. Die skugter en heelwat kleiner swartrenoster verkies die meer bergagtige Hluhluwe-deel. As jy twyfel: Die swartrenoster is die een met die beneukte uitdrukking.

Koste Bewaringstarief van R110 p.p. vir al twee dele van die park. Halfprys vir kinders jonger as 12.

Blyplek Mpila-ruskamp (iMfolozi): Safaritent en selfsorghuise vanaf R1 030 p.n., slaapplek vir 2 mense. Hilltop-ruskamp (Hluhluwe): selfsorgrondawels vanaf R720 p.p. Selfsorgchalets vanaf R2 700 p.n., slaapplek vir 3 mense. Private lodge: vanaf R5 400 p.n., slaapplek vir 6 mense.

WENK Drink ’n koffie op die stoep van die Mpunyane-restaurant in die Hilltop-ruskamp. Gooi ’n R5 in die staanverkyker – dis St. Lucia se duine wat jy daar doer sien.

035 550 8476 (iMfolozi); 035 562 0848 (Hluhluwe); kznwildlife.com