15 PANORAMAROETE, BLYDERIVIERCANYON
Uitsigte by dosyne
Mpumalanga se Panoramaroete gaan jou verwonder laat. Dié roete loop al langs die verre noordoostelike punt van die Drakensbergse platorand, waar die Hoëveld die knie tot in die Laeveld buig. Hier’s vyf watervalle, vyf uitkykpunte en ’n rits ongewone goed soos Bourke’s Luck se maalgate so groot soos swembaddens, die hengse glashysbak by Graskop én ’n skoen waarin jy kan oornag (langs die R36 noord van Ohrigstad).
Moenie dié roete van die dorpie Sabie af verby Graskop, plantasies en gapende afgronde tot by die Drie Rondawels-uitkykpunt in een dag ry nie – dis te veel om in te neem. Trouens, maak ’n langnaweek daarvan en doen ook Ohrigstad en Pelgrimsrus aan.
Die weer is nóg ’n rede om langer as ’n dag te kom. Die roete is in ’n somerreënvalstreek en wanneer dit op sy groenste en die watervalle vol is, is die landskap dikwels in mis gehul. En dan gaan jy by God’s Window niks sien nie! Koste Toegangstarief by Burke’s Luck (dié foto): R55 p.p. en R20 per kind.
WENK Die meeste uitkykpunte lê oos van die roete en is dus laatmiddag op hulle mooiste.
013 764 1177; sabie.co.za; graskop.co.za