SYLVIA DU TOIT

Canon Powershot SX60 HS

SYLVIA SKRYF: Dié koringlande lê tussen Saint-Germain-de-Coulamer en Courcité in Frankryk. Die komposisie, vorms en kleur het my aandag getrek. Die boere stroop die koring hier teen einde Julie.

Die natuurskoon op die Franse platteland is mooi en my seun moes om elke hoek en draai stop vir ’n foto. Hy woon tans in Londen en het eiendom in Frankryk – ons het ’n ruk daar gaan kuier.

Ek stel ook veral in Frankryk belang aangesien ek die Du Toitfamiliegeskiedenis op CD bekom het. Ek kon my man se familie daarin opspoor.

Hulle geskiedenis begin waar die Hugenote-broers Guillame en Francois du Toit hulle op 23 Junie 1686 aan die Kaap vestig.

TOAST SÊ: Ek hou van hierdie foto omdat dit nié ’n foto van die Eiffeltoring is nie. Die mooi in ’n vreemde land is nie net die bekende toeriste-attraksies nie. Soms is dit die gewone – soos hierdie landelike toneel.

Dis goed om in ’n mens se familiespore te kan terugstap.

Die verlede is soos foto’s neem. Wanneer jy foto’s neem, gee jy aandag. Deur aandag te gee, sién jy. Net so met ’n blaai deur die geskiedenisboek.

Die herhaling in vorm van die bale is treffend, asook die laslappiekombers van landerye wat die agtergrond uitmaak. Dankie dat jy hierdie met ons gedeel het, Sylvia.