AGTER DIE SKERMS

Waar was jy al nóg gewees?

Swaziland, Namibië, Zimbabwe, Mosambiek, Zambië, Italië, Spanje, België, Nederland, Portugal, Frankryk, Duitsland, Hongkong, Singapoer, Thailand en Amerika. Vir nou vat Portugal die koek. Die musiek, die mense, die boekwinkels en (natuurlik) die pasteis de nata (vlatertjies) het my hart gesteel.

Hoe bekostig jy dit?

Ek spaar! En terwyl ek reis, probeer ek so min as moontlik op blyplek uitgee. Ek slaap meestal in backpackers – hulle bied saans gratis aktiwiteite aan wat jy nie noodwendig aanlyn sal vind nie, dinge soos staptoere deur die betrokke stad.

’n Lekker plek om te begin is Airbnb se Experiencesafdeling. Die app Culture Trip: For Curious Travelers is ook ’n wenner!

Die American International School of Johannesburg waar ek werk, moedig ons aan om kursusse oorsee by te woon. Ek kombineer dit gewoonlik met ’n vakansie.

Hoekom reis jy?

Dit is bevrydend en verrykend. Ek neem die nuwe klanke, reuke, landskappe en smake soos ’n spons in.

Wat versamel jy op jou reise?

Ek soek in elke land ’n eksemplaar van Die klein prinsie deur Antoine de SaintExupéry. Ek het een in Afrikaans, Engels, Frans, Duits, Italiaans, Latyns, Spaans, Portugees, Japannees en Nederlands.

Waarheen volgende?

Ek het aansoek gedoen om ’n Learning, Memory, Questioning and Feedback-kursus van Dylan William op die dorpie Baar in Switserland by te woon. Ek hoop om daarna te gaan sneeuplankry in die Alpe!

Vertel ons van jou tuindwerg...

Sy naam is Joachim en hy reis saam in my handsak, rugsak of broeksak as ek ’n nuwe plek besoek. Ek het die idee van die Franse fliek Amélie gekry waar die tuindwergie gebruik word as ’n simbool van ontdekking. Kyk die fliek om dit beter te verstaan!