Maar waar’s Gansbaai?
Ek het onlangs die Klassieke Reisplan oor die Overberg in Weg #182 gelees en was teleurgesteld dat Gansbaai oorgeslaan is.
Ek kan maklik agt bladsye net oor Gansbaai skryf: Daar is wonderlike natuurskoon, strande en grotte in die gebied en dis bekend vir die walvisse en grootwithaaie.
Gansbaai het baie goeie restaurante, die hawe is ’n besoek werd, en daar is geskiedkundige en skeepswraktoere om te doen. Jy kan ook die vuurtoring by Danger Point besoek of jou kinders na die Uilenkraalsmond-oord naby Franskraal neem waar hulle op die Supertube kan speel.
Ek besit eiendom op Gansbaai en is baie trots op alles wat die dorp bied.
ALICIA WHITTING, Mbombela
Ons koop gereeld julle tydskrif omdat die inhoud van so ’n hoë gehalte is. As die eienaars van ’n gastehuis en aktiewe lede van die toerismegemeenskap op Gansbaai was ons teleurgesteld om te sien dat ons dorp nie eens in die artikel oor die Overberg genoem is nie.
Dit was haas onmoontlik vir julle skrywers om Gansbaai mis te ry aangesien hulle plekke soos Baardskeerdersbos besoek het. Dalk was daar net te veel te skryf oor Gansbaai en nie genoeg plek in die tydskrif nie?
Wat ’n jammerte!
CARON LEE EN DAVE SAWTELLE, Gansbaai
Dankie dat julle dit onder ons aandag gebring het – julle maak ’n geldige punt. Daar is so baie wonderlike plekke om te besoek, maar ook net soveel blaaie in die tydskrif. Dit is hoekom daar elke maand ’n nuwe Weg op die rakke kan wees. Ons glo ons reisplan sal besoekers inspireer om die hele gebied te verken, en ook dat hulle langer sal bly as wat ons voorstel. Ons hoop om binnekort in Gansbaai ’n draai te maak. – Red.
Die Overberg sê dankie
Ek wil graag die skrywers van die Klassieke Reisplan bedank vir die artikel oor die Overberg. Ons het reeds stapels van die tydskrif gekoop en ek dink die artikel sal help om toeriste na ons gebied te lok.
Dié besoekers sal ook die gebied verder verken, wat tot die voordeel van baie ander Overbergbesighede sal strek.
FRIEDA LLOYD, toerismebestuurder van die Overberg
munisipaliteit