STAP, STAP, EN STÁP
Spanje, Peru of... Japan? In 2020 neem Weg stapgroepe na vier verskillende bestemmings. En as jy nie kans sien vir die groepding nie, kan jy nou ook jou oorsese staptoer deur ons bespreek en jou eie ding doen.
INKA IN PERU
Wanneer 29 Maart tot 6 April 2020
Wat? Beleef ’n stukkie van Peru en die kultuur van die locals, en loop die befaamde Inka-roete in die Andes tot by Machu Picchu, een van die Sewe Wonders van die Wêreld. Die Inka-roete is kort – sowat 45 km in totaal – en die staptog van 4 dae behels hoogstens 16 km per dag.
Onthou egter dis op ’n hoogte van meer as 3 000 m bo seevlak en dis in die berge. Die reis begin met ’n paar dae in Cusco en die Heilige Vallei sodat jy kan akklimatiseer.
Weg sê Hierdie is een vir die wenslys en die roete is skouspelagtig. Machu Picchu is uiteraard ’n groot hoogtepunt, maar jy gaan verskeie ander Inka-terreine langs die pad sien wat ewe indrukwekkend is en wat jy nie met ’n horde toeriste hoef te deel nie.
Beginners is welkom, maar word aangemoedig om bulte te oefen. Jy kan ook nie neusoptrekkerig wees oor jou bad- en stortgeriewe nie.
Hoeveel? R39 295* p.p. wat deel
Wat sluit dit in? Vlugkaartjies, alle verblyf en alle vervoer, etes terwyl jy stap. Portiere dra 6 kg van jou bagasie – die res dra jy self.
FRANSE CAMINO IN SPANJE
Wanneer? 3 tot 12 April 2020
Wat? Die Franse Weg is die gewildste van al die roetes op die Camino de Santiago. Op hierdie toer loop jy die laaste sowat 115 km van Sarria af tot by die katedraal in Santiago de Compostela – genoeg sodat jy jou Compostela ( jou sertifikaat van voltooiing) kan gaan afhaal.
Die roete is nie te moeilik nie en die afstande per dag nooit te ver nie (die kwaaiste dag is 25 km). Beginners is welkom.
Weg sê Jy gaan verskeie outentieke Spaanse dorpe langs die pad sien, tradisionele Spaanse kos eet en pelgrims van die wêreld oor op hierdie roete ontmoet.
Die laaste dag, wanneer jy die “Berg van Vreugde” (dis eintlik maar ’n heuweltjie) na Santiago oorsteek, is ’n groot lekkerte. Hoeveel? R28 940* p.p. wat deel
Wat sluit dit in? Vlugkaartjies, alle verblyf, die vervoer van jou rugsak bedags na die oornagdorpe, agt ontbyte en aandetes, busvervoer (wanneer die groep nie stap nie).
PORTUGESE CAMINO IN SPANJE
Wanneer? 22 April tot 3 Mei 2020
Wat? Op hierdie Camino stap die groep die Portugese kusroete van Baiona, in totaal sowat 125 km, na die katedraal in Santiago de Compostela. Jy kwalifiseer op hierdie roete ook vir ’n Compostela (’n sertifikaat van voltooiing). Naas die Franse Weg stap die meeste pelgrims hierdie roete. Die eerste dag is die moeilikste. Jy stap 28 km, maar daarna is die afstande rondom 20 km per dag. Dis ’n maklike roete en beginners is welkom.
Weg sê Dis die mooiste van al die Camino’s en jy gaan lang ente langs die strand stap. Daar is verskeie hoogtepunte, soos die Jules Verne-standbeeld in Vigo en die mooie dorpie Pontevedra. Pak jou swembroek in! Hoeveel? R35 400* p.p. wat deel
Wat sluit dit in? Vlugkaartjies, alle verblyf, die vervoer van jou rugsak bedags na die oornagdorpe, nege ontbyte en sewe aandetes, busvervoer (wanneer die groep nie stap nie).
DIE KUMANO KODO IN JAPAN
Wanneer? 16 tot 28 Mei 2020
Wat? Die Kumano Kodo word as Japan se Camino beskou en dié antieke pelgrimstog, wat sedert die 10de eeu deur pelgrims gestap word, het ’n amptelike verbintenis met dié eeue oue pelgrimsreis in Spanje.
Stappers wat reeds die Spaanse Camino afgelê het, kan aansoek doen om ’n spesiale sertifikaat in Japan.
Weg sê Spaar maar – dis epies! Die totale pelgrimsreis is “net” 69 km, maar moenie dit onderskat nie. Beginners is welkom, maar jy sal moet bulte oefen voor jou reis.
Prys R46 500* p.p. wat deel
Wat sluit dit in? Vlugkaartjies, alle verblyf (vyf nagte op die Kumano Kodo, 2 nagte in Kioto en 3 nagte in Kurashiki), alle ontbyte, vervoer na die volgende oornagdorp en treinkaartjies tussen die groot stede.