Kyk hoe rol ek my oë
Verkleurmannetjies lyk koddig, maar hierdie akkedisse met hulle uitpeuloë kan dinge doen wat jou sal verbaas! Vertel jou maats dié feite.
Omtrent die helfte van hulle kom op die eiland Madagaskar voor, en die res in Afrika, Asië en Suid-Europa.
Die spesies verskil baie van mekaar in voorkoms en grootte. Party is byna so klein soos ’n vuurhoutjie se kop (regtig!), terwyl ander spesies weer so groot soos ’n huiskat raak! En dan wissel hulle kleure ook van heldergroen tot bruin, blou of oranje.
Hulle hou in grasvelde, woude, woestyne en selfs hoog bo teen die hellings van berg Kenia.
ONS NOEM DIÉ RY STEKELTJIES OP ’N VERKLEURMAN SE LYF ’N RUGKAM
Die stekels verskil van spesie tot spesie – dit kan groot en eweredig gespasieer wees óf klein, en stomp en oneweredig. Soms het die rugkam ook ’n ander kleur as die res van die lyf.
NÓG N POOT
Afgesien van die knyppote het die verkleurman nóg ’n grypledemaat – sy stert. Dié vyfde “poot” sorg dat hy goed kan klim. Wanneer die verkleurman rus, is die stert styf opgerol. Die meeste akkedisspesies kan hulle sterte afgooi as hulle bedreig word en wil ontsnap, maar ’n verkleurman kan dit nie doen nie en as sy stert afgekap word, groei dit nie terug nie.
VERKLEURMANNETJIES KAN BAIE MOOI SIEN
Elke groot oogbal kan op sy eie ronddraai – daarom kan ’n verkleurmannetjie op dieselfde oomblik in twéé verskillende rigtings kyk!
DIE LYF IS OORTREK VAN HOBBELRIGE SKUBBE
Die pote is goed aangepas en help die dier om ’n stewige houvas op ’n tak te kry. Die skerp naels help ook vir vasklou. Hy beweeg byna geluidloos en daarom word hy ook ’n “trapsuutjies” genoem.
Het jy gedink dat ’n verkleurman sy velkleur verander om mooi by sy omgewing in te pas? Dit is nie hééltemal waar nie. Nee, dis die verkleurmannetjie se reaksie op dinge soos lig en die temperatuur. Wanneer dit warm is, raak ’n ver-kleurman se velkleur ligter; as hy koud kry, raak sy velkleur donkerder.
Hulle gebruik ook hulle veranderende velkleur om met mekaar te gesels en is glád nie skugter oor hulle gevoelens nie!
’n Mannetjie sal dalk helder kleure wys om ’n wyfie se aandag te probeer trek. Die wyfie antwoord dan ook met ’n sweempie kleur om te sê of sy van hom hou, of nie.
’n Mannetjie sal ook sekere kleure aanneem om ander mannetjies af te skrik. Skoert, jy! Dis mý boom dié!