VAKANSIE IN VIËTNAM
Ek is mal oor die Ooste, maar Singapoer brand jou beursie en Thailand is te kommersieel. Reisbrosjures beloof “ongerep,” “moderne geriewe” en “goedkoop” – in Viëtnam is jy al drie gewaarborg.
“Honderde sampans dryf met toeriste langs die Sao Khe-rivier af, verby formasies wat aan Ha Long Bay se eilande herinner. Plek-plek stop van die bote by pagodas versteek in die groen ruigtes, of om na ’n musiekvertoning te luister.”
Viëtnam was nooit ’n oop boek nie. Ek het iets van die oorlog geweet, en later jare het kommunisme gesorg dat ’n mens maar bra min te lese kry. Eers laat in die jare tagtig het moedige toeriste die land besoek en dit was vir my moeilik om wrede oorlogsbeelde met dié mooi land te vereenselwig.
Verlede jaar het ek die kans gehad om self die land te ervaar. Hoewel die land oor die laaste 30 jaar baie uitgebrei het, is dit steeds mooi en meestal ongerep en (nog nie) ’n wilde toeristekol nie.
Die strate van Hanoi
Die woord “Hanoi” herinner aan ’n geheimsinnige Ooste, maar met ons aankoms by die
Noi Bai-lughawe is ek en my vrou nie beïndruk nie. Terwyl ons vir ons visums wag, kondig iemand aan: “Aandag, asseblief. Ons het vroeër aangekondig ’n vuur het uitgebreek. Wees gerus: Daar’s geen vuur nie. Dankie.”
Met al die formaliteite afgehandel, reis ons met ’n groot hoofpad na die Old Quarter, die hart van die hoofstad. Dis ’n warboel, met duisende toeriste, maar alles wat jy wil sien, is stapafstand. Moenie bekommerd wees nie; ’n mens raak gou die deurmekaar verkeer baas.
Die Hoan Kiem-meer oorheers die omgewing – dis ’n wateroase midde-in die geroesemoes.
Dit vat omtrent ’n halfuur om om die meer te stap, maar jy kan kort-kort stop vir bia hoi (“vars bier”). Van die Viëtnamese glo dat ’n mitiese waterskilpad wat eeue gelede glo die koning gehelp het om die Chinese te verslaan steeds in die meer woon.
Hanoi het hope om te sien: Maak jou moetsienlysie vooraf. Ek het die Museum of Literature, die Hoa Lo-tronk, die Museum of Women en die Dong Xuan-mark veral geniet.
Nog ’n insiggewende plek is Train Street. Drink ’n goeie koppie Viëtnamese koffie en ervaar hoe van die inwoners enkele duimbreedtes van ’n werkende spoorlyn woon en werk. Kry ’n tydrooster om seker te maak wanneer ’n trein verbykom.
’n Besoek aan die mausoleum van die Viëtnamese held Ho Chi Minh is eienaardig. Streng soldate sien toe dat absolute stilte heers terwyl toeriste (en aanhangers) die gebalsemde liggaam bekyk. (In die algemeen is die Viëtnamese vriendelik en behulpsaam, maar vir staats- en militêre beamptes moet jy katvoet wees.)
Wanneer die hitte en bedompigheid jou onderkry, gryp ’n Grab: Dis Suidoos-Asië se weergawe van Uber. Probeer eerder nie in spitstye een haal nie – dit kan ’n nagmerrie wees. Grab bied ook ritte met ’n bromponie wat goedkoper is. Onthou, in Hanoi kraai bromponies koning en dis nie vreemd om ’n ganse gesin op een te sien nie!
Oorkant die Hoan Kiem-meer kan ’n mens een van die Water Puppet-vertonings kyk. Moenie aanlyn kaartjies koop nie, want dis goedkoper by die teater (R140). Die kundigheid van die poppemeesters is verstommend.
Natuurlik is Hanoi ’n goeie plek om ’n mens aan die plaaslike kos bekend te stel. Gelukkig is die straatkos heerlik en bekostigbaar. Probeer beslis bahn mi (’n broodjie met tipies gevlokte vleis en groente, asook pho (noedels in geurige sop). Bespreek ’n straatkostoer: ’n Gids neem jou na verskillende eetplekke waar jy plaaslike geregte proe, en sommer oor die kosmaakmetodes leer. Jy leer boonop meer oor die Old Quarter. So ’n toer kos ongeveer R200.
Kry jou seebene in Ha Long
Ja goed, Ha Long Bay is dík van toerisme, maar met goeie rede. Hierdie Unesco-Wêrelderfenisterrein (oorkantste blad) is beeldskoon. ’n Mens kyk skoon verby die mense en jy hoor later nie meer al die aksente nie.
Bestel ’n skemerkelkie, sit agteroor op jou boot en verkyk jou aan die meer as 1 600 eilande wat verby dryf.
Bly in Ha Long (hier is ander dinge ook te doen, soos die jaarlikse marathon), maar ’n pakkettoer is ’n goeie manier om die baai te sien. ’n Daguitstappie is die goedkoopste, maar ’n aand of wat op die boot is ’n regte bederf (verskillende pakkette is beskikbaar). Ha Long is ongeveer drie en ’n half uur se ry van Hanoi af.
Dié toere sluit alles buiten drankies in, en bied ook uitstappies soos om pêrelplase te besoek of kajakroei. Maar moenie alles probeer inryg nie – geniet die uitsig; jy gaan nie maklik weer iets so mooi sien nie. >
Besoek ’n grot in Tam Coc
Ninh Binh en die kleiner dorp Tam Coc is jou poorte tot die platteland en vele buitelugaktiwiteite. Tam Coc lok heelwat backpackers, en inligting oor toere en uitstappies is geredelik beskikbaar.
’n Mens kies moeilik, maar die uitsig van die Hang Mua-spits (3 km van Tam Coc af) sal nie teleurstel nie. Die 486 steil trappe neem ongeveer ’n uur en ’n half om uit te klim, maar die uitsig oor die kalkkoppies en ryslande in die Tam Coc-vallei is die stywe kuite werd.
Nog ’n lekker uitstappie is ’n boottoer deur die grotte in die mooi Trang An-omgewing, wat ook ’n Unesco-Wêrelderfenisgebied is.
Honderde sampans dryf met toeriste langs die Sao Khe-rivier af, verby formasies wat aan Ha Long Bay se eilande herinner. Plek-plek stop van die bote by pagodas versteek in die groen ruigtes, of om na ’n musiekvertoning te luister. Van die bootmanne en -vroue is só bedrewe dat hulle die sampan met hulle voete stuur!
Die Bai Dinh-Boeddhistetempel is ook in die omgewing – dis die grootste tempel in Viëtnam.
Die maklikste opsie is ’n toer wat al hierdie aktiwiteite insluit, maar dis goedkoper om ’n fiets te huur (ook gratis by sommige hotelle) en ’n kaart te kry. Alternatiewelik kos dit ongeveer R100 per dag om ’n bromponie te huur.
Die kospotte van Hoi An
Hoewel Viëtnam smal is – net 50 km op die smalste – is dit 1 650 km van die noorde na die suide, en dis nie oral ewe maklik om van die een plek na die ander te reis nie.
’n Slim manier om tyd (en geld vir blyplek) te spaar is om saans te reis. Treine loop gereeld van Hanoi in die noorde tot in Ho Chi Minh City in die suide en hou stil by die meeste van die groot dorpe. Die slaapwaens is basies dog skaflik – en nié duur nie.
Nog ’n opsie is ’n oornagbus, veral na dorpe wat nie langs die treinspoor geleë is nie.
Jy kry ’n verstelbare sitplek en ’n twyfelagtige kombers. Ons het vir 400 km in gietende reën van Tam Coc tot Phong Nha gery, maar genadiglik geslaap.
Aanlyn is egter baie artikels wat waarsku dat dié busdienste nie regtig veilig is nie.
Van Dong Hoi na Da Nang (270 km, vyf en ’n half uur) het ons met ’n dagtrein gery. Dit was ’n aangename rit deur die laaste stuk mooi heuwels langs die kus. Da Nang was in die oorlog ’n Amerikaanse lugmagbasis, maar vandag is dit ’n vooruitstrewende stad met mooi strande.
Ons was egter op pad na Hoi An – ja, reg geraai, nóg ’n Unesco-Wêrelderfenisgebied. Hoi An se Ancient Town is ’n doolhof van stokou tempels, keistene, vervalle huise, waterfrontrestaurante, kroeë en kleurryke markte.
En natuurlik die koffie waarvoor Viëtnam bekend is – die land is die naasgrootste uitvoerder van koffie: Kies hoe jy dit wil geniet: Net koffie óf met kondensmelk, en selfs die gewilde egg coffee… dis wraggies lekker!
Of jy wil foto’s neem of eet, moenie die Lantern Market misloop nie. Dis oor die brug van (lees mooi) Hoi An na An Hoi. Die lanterns is die aantrekking (vanaf ongeveer R50), maar die varsgebraaide seekat en ander eetgoed (R20-R40) en hope ander aandenkings en klere is ook interessant.
Probeer gerus cao lau (gebraaide varkvleis en noedels) en banh bao vac (“white rose”kluitjies). Hoi An beweer banh mi is eie aan dié stad, maar dit word oral verkoop.
Jy kan ook ’n romantiese gondelvaart oor die Thu Bon-rivier bespreek (R100-R200) as jy die bootmanne se gekibbel oorleef.
Dit woel in Saigon
In Ho Chi Minh City – beter bekend in die suide as Saigon (die naam voor onafhanklikheidswording) – is District 1, waar ’n mens die goedkoopste blyplek kan kry. HCMC is uitgebreid en oorbevolk: 15 miljoen mense
leef soos sardyne en 11 miljoen besit bromponies, wat óral is. Jy wil beslis nie hier rondrits nie; voetslaan is ’n beter opsie.
Die Rooibus is ook ’n plan. Onthou net, in Saigon is toeristebusse wit.
’n Kaartjie is aan die duur kant, maar as jy dit heeldag gebruik, is dit beslis elke sent werd. Die bus stop onder meer by die Independence Palace (dit bring hulde aan die 1970’s) en die Notre Dame-katedraal wat opgerig is van boumateriaal uit Frankryk.
Die katedraal is net oorkant die Sentrale Poskantoor waar ’n ry horlosies die tyd in van die belangrikste stede wêreldwyd – insluitend
Pretoria! – aandui. Nog ’n interessante stop is die Bitexco Financial Tower. Dit kos sowat R130 p.p. om op die Skydeck op die 49ste verdieping te kom, maar jy kry ’n ongeëwenaarde uitsig oor die stad.
Al besoek jy net een museum in Viëtnam, maak seker dis die War Remnants Museum, ’n optekening van die “burgeroorlog” en die Westerse betrokkenheid. Die uitstallings is hartverskeurend. As jy nog wil sien, is daar die Cu Chi-tonnels net buite Saigon. Die
Viet Cong-lede het hulle in die tonnels versteek gedurende gevegte.
Vir iets meer ontspannends, vat ’n wandeling met Walking Street langs – dis ’n breë boulevard wat in die aande gesluit is. Tussen die musiekmakers, straatsokkerwedstryde en kuierkopers is die kans goed dat ’n groep studente jou sal nader. Moenie skrik nie – hulle wil net gesels om hulle Engels te verbeter.
Daar is ook hope waarby ons nie eens uitgekom het nie: Paradise Cave (enorm en groot); die ryslande van Sa Pa; Bana Hills met sy epiese kabelspoor en die Hands of the Gods-brug...
Een artikel kan kwalik weergee wat Viëtnam alles bied – jy moet maar self gaan kyk.
Moet egter nie te lank wag nie, want die land ontwikkel vinnig en van die ou gebruike gaan agterweë bly. Pryse is aan die styg en die uitbreiding van die stede spoel oor na die platteland.
Gaan dus voor Viëtnam te kommersieel raak.
WEET VOOR JY GAAN
Hoe kom ek daar? Verskeie lugdienste bied vlugte uit Kaapstad, Johannesburg en Durban na Hanoi en Saigon. Niks hiervan is direk nie, en dis ’n la-a-a-ng vlug. Vlugte is ongeveer R10 500 vir ’n retoerkaartjie. Kort ek ’n visum? Doen vooraf aansoek. Ons het govietnamvisa.com gebruik en sowat R260 p.p. betaal. Met jou aankoms toon jy dokumente wat jy per e-pos ontvang en betaal R360.
Blyplek Hier is oorgenoeg om van te kies. Vir R300 p.p. kan ’n mens ’n basiese kamer bespreek (dis selfs minder in ’n hostel of iemand se huis. Onthou, jy gaan baie meer betaal as jy luukses soek.
Die webwerf booking.com is ’n betroubare bron, veral as jy op die nippertjie van plan verander. Lees egter aanlynterugvoer met ’n knippie sout. Hotelpersoneel is in die algemeen hulpvaardig en verstaan meestal Engels.
Geld Een rand is gelykstaande aan ongeveer 1 600 Viëtnamese dong. Maak só: Vat drie nulle weg en skat twee derdes van wat oor is.
’n Koppie koffie van VND15 000 kos dus sowat R10.
Kitsbanke is volop en van die kleiner winkels het ’n diens wat met ’n elektroniese kaartleser werk. Onthou om jou bank te laat weet jy gaan jou kaarte oorsee gebruik. Toere en daguitstappies Dis baie goedkoper om uitstappies soos die kostoere en na Ha Long Bay by onafhanklike ondernemings te bespreek (daar’s een in byna elke straat) as by die hotel waar jy bly.
Hoe is die vervoer? Tussen stede is ’n goeie busnetwerk en ordentlike treinstelsel. In die groter stede is interne busdienste, maar die Grabapp (vir Android en iOS) is geriefliker en goedkoper as Uber by die huis.
In stiller gebiede is bromponies en fietse ook ’n opsie.
Die interne vlugnetwerk is uitgebreid, maar duur (steeds goedkoper as by die huis). Dis veral nuttig as tyd beperk is.
Indien jy op ’n inkopietog is, is dit goed om te onthou dat die vlugbagasie beperk is tot 20 kg, anders gaan jy opdok.
Stap bly maar die beste opsie ten spyte van die hitte, bedompigheid en reën. Die land is ook redelik veilig.
In Saigon is daar soms sakkerollers, maar ons het geen probleme gehad nie.
Kommunikasie Wi-Fi is beskikbaar in byna elke winkel. Hier is ook heelwat verskaffers van sellulêre dienste, sou jy ’n SIM-kaart wou hê, maar ons het nie gedink dis nodig nie. Ontvangs kan problematies wees.
Wat is die beste tyd om te gaan? Dis ingewikkeld. Die noorde, middel en suide verskil van mekaar. Die temperatuur wissel tussen die middel 20’s tot middel 30’s.
Die eerste keuse is lente (Februarie tot April). Dit reën dan min, maar die land is besig. Herfs is ook goed, maar die kans op reën is groter. Dis ’n moesonland met storms, tifone en vloede.
Lus om ook Viëtnam toe te gaan? Gebruik ons webwerf wegreis. co.za om die vlugpryse van verskillende lugdienste te vergelyk. Óf skakel 021 879 2210 of stuur ’n e-pos na wegreis@travelcheck. co.za vir hulp.