Sterreweg
Die Suid-Afrikaans gebore Elon Musk is deesdae besig om honderde satelliete die ruimte in te stuur. Sy maatskappy, SpaceX, sal eersdaags meer werkende satelliete in die wentelbaan om die aarde hê as die res van die wêreld se satellietoperateurs saam! Dis nogal skouspelagtig om ’n oorvlug van hulle te sien terwyl hulle nog na aan mekaar is – dit lyk soos ’n satelliettreintjie.
Ongelukkig moet jy ondervinding van satellietjag hê om hulle te kan dophou – daar is nie genoeg plek in dié rubriek om dit in detail te verduidelik nie. Maar ’n mens moet iewers begin... Kom ons begin dus by die helderste satelliet – die Internasionale Ruimtestasie (ISS).
Een van die beste webwerwe vir satellietvoorspellings is heavens-above.com. (Die app se naam is Sky Live: Heavens Above Viewer.)
Eerstens moet jy die dorp of stad waarvandaan jy wil kyk, aandui. Dit doen jy onder “Configuration” op die webwerf en “Settings” op jou slimfoon. Die selfoon se ingeboude GPS is hier baie handig.
Om voorspellings vir oorvlugte van die Internasionale Ruimtestasie te kry, klik eenvoudig daarna op “ISS” (op die webwerf én foon). As jy op die datumvoorspelling klik, kry jy ’n mooi sterrekaart wat presies wys hoe die satelliet teen die sterreagtergrond gaan oorbeweeg.
Op die slimfoon word ingeboude sensors ingespan sodat jy dit kan mik in die rigting van waar die satelliet besig is om te beweeg.
In Maart doen die Internasionale Ruimtestasie vir ’n week oorvlugte soggens, en ’n week saans. Dis so helder dat jy dit nie maklik kan miskyk nie! Probeer om ook ander helder satelliete of Elon Musk se Starlinks te vind. Geniet jou satellietjagtog!
Willie Koorts
Kyk Willie se YouTube video by bit.ly/ watchthesky vir meer inligting oor Elon Musk se Starlinks-satelliete.