Afskrikmiddels teen slange – die feite
Suid-Afrikaners gebruik ’n verskeidenheid goed as afskrikmiddels teen slange: Jeyes Fluid, Condy’s Crystals (kaliumpermanganaat), ou motorolie, motbolletjies, plante soos malva en wildeknoffel, asook kommersieel beskikbare afskrikmiddels wat die chemiese middel naftaleen bevat.
Die gebruik van hierdie produkte is nie beperk tot Suid-Afrikaners nie – in lande soos die VSA en Australië word gewilde afskrikmiddels teen slange gemaak en gebruik.
Ongelukkig is daar geen middel wat slange afskrik nie, ten spyte van die stories wat mense jou vertel.
’n Klomp sogenaamde afskrikmiddels is in ’n laboratorium by die Universiteit van die Witwatersrand getoets. Navorsers het tot die gevolgtrekking gekom dat geen van dié middels ’n noemenswaardige uitwerking op slange het nie.
Frans Reynecke, ’n kenner aan die Universiteit van die Noordwes, het soortgelyke toetse in Limpopo gedoen. Die resultate is by ’n onlangse konferensie van die Herpetologiese Vereniging van Afrika bekend gemaak.
Navorsers het 24 loklyne in die veld opgestel en dit bedek met verskillende stowwe waarvan sommige hierbo genoem word.
Hulle het ’n metode genaamd gaschromatografie-massaspektrometrie gebruik om die doeltreffendheid van sekere reuke op slange te toets om te sien of hulle slange afskrik.
Dié ingewikkelde woord verwys eenvoudig net na die twee instrumente wat hulle gebruik om die reuke te toets.
Die eksperiment is vier keer herhaal en die resultate was duidelik – nie een van die sogenaamde afskrikmiddels het ’n noemenswaardige uitwerking op slange gehad of hulle uit ’n sekere gebied gehou nie.
Ja, jy mors jou tyd om die middels op jou werf te spuit!
Elektriese heinings maak dikwels slange dood – maar ook skilpaaie, krimpvarkies en ander klein wilde diere. Tog hou dit nié slange weg nie.
’n Ander nuttelose toestel is die “slangskerm,” ’n ronde metaalstaaf wat deur sonkrag aangedryf word en waarvan die bopunt vibreer. Hierdie stuk toerusting is getoets en dit werk ook nie.
Slange soek dikwels ’n skuilplek of hulle word deur kos gelok. As jy knaagdiere, ’n voëlhok, ’n hoenderhok, swembad of fonteintjie op jou erf het, is die kanse goed dat jy een of ander tyd ’n slang sal raakloop.
As jy ’n slang teëkom, gee onmiddellik vyf treë agtertoe en hou die slang van ’n veilige afstand af dop. Bel ’n slangvanger; daar is landwyd meer as 500 geregistreerde slangvangers wat op die gratis app ASI Snakes bit.ly/ snakebiteapp gelys is.
Tensy jy opgelei is om slange te vang moet jy tog nooit probeer om dit self te doen nie!