Not Child’s Play
deur Dave Muller, MFBooks Joburg
R250 in boekwinkels
Min dinge is erger as ’n gesinsvakansie wat in ’n totale nagmerrie ontaard. Hierdie boeiende memoir vertel wat die Muller-gesin van Oos-Londen – Dave, sy vrou, Sandy, en hulle twee kinders, Tammy (8) en Seth (5) – getref het.
In 1990 het die gesin noord geseil na die Bazaruto-eilandgroep op hulle geliefde seiljag, Arwen. As seun het Dave daarvan gedroom om eendag met sy eie seiljag eksotiese plekke te verken.
Nadat hulle ’n woeste storm naby Bazaruto oorleef het, besef Dave “you may chase your dream, but don’t presume you are in control of your fate”. Kort hierna het hulle seiljag gestrand.
Dit was in die tyd van die burgeroorlog in Mosambiek, maar die gesin is vooraf deur toerismebeamptes gerus gestel dat die kuslyn veilig is. Toe nie...
Hulle is gevange geneem deur vyf Renamo-kindersoldate met AK47’s, wat dieselfde dag twee ander volwasse gyselaars met bajonette vermoor het.
Dave en sy gesin was 49 dae lank gyselaars by ’n Renamo-kamp totdat hulle uiteindelik in ’n militêre operasie gered is.
Hy skryf ook oor die paradoks van die genadelose kindersoldate wat soms met sy eie kinders gespeel het. Selfs al was hulle by tye vreesbevange, kon Dave betekenis vind in wat hy beskryf as “precious times of forced togetherness”.
Not Child’s Play lees soos ’n puik spanningsroman en is ’n merkwaardige vertelling oor die bisarre beproewing van ’n gesin wat net vakansie wou hou.