DIE KLASSIEKE DRIE
Platteklipravyn
Moenie dat die naam Platteklip jou mislei nie – die roete is allermins plat! Hoewel dit die veiligste roete tot bo-op Tafelberg is, het heelwat stappers al hulle moses teëgekom aan die voorkant van die berg. Gaan stap liefs vroegoggend of in die agtermiddag wanneer die son nie so giftig brand nie.
Die eerste 300 m klim deur digte fynbos al langs ’n stroompie tot by ’n kruising met die kontoerpad. Volg die kontoerpad na links vir sowat 100 m tot waar die Plattekliproete na regs opdraai. Van hier af is die sigsagroete tot bo duidelik sigbaar.
Die volgende 500 m van die roete het geen skaduwee nie. Moenie in die son staan en rus nie – druk eerder deur tot by die rotswand ’n paar 100 m verder. Die laaste 500 m is reguit op met die kloof, maar dis darem in die koelte van kranse. In die winter is hier gewoonlik stroompies wat by die rotswande af loop.
Parkeerplek Die beginpunt is op Tafelbergweg,
1,5 km verby die onderste sweefspoorstasie. Soek na ’n parkeerplek langs dié teerpad.
Kasteelspoort
Dié roete is Platteklipravyn se stiller en aantrekliker neef en gee jou toegang tot ’n minder bekende deel van die berg en ’n grootse uitsig van Kampsbaai en Bakoven.
Om by die beginpunt uit te kom, moet jy eers sowat 3 km met die Pyppad (sien bl. 37) langs stap tot waar Kasteelspoort teen die berghelling opswenk. Jy kan jou maar gereed maak vir lam bobene, maar die roete is relatief eenvoudig en jy hoef net hier en daar ’n bietjie te klouter.
Sowat 1 km van waar die klim begin, is ’n groot, plat klip (Breakfast Rock) – hou piekniek en neem kiekies van Leeukop in die noorde. Hierna swaai die voetpad in ’n kloof op; bo is jou opsies legio: Op ’n windstil dag kan jy die moed bymekaar skraap om op Die Duikplank (foto bo) te gaan staan.
Of mik reguit verby die damme, deur Echovallei en met die Smutsvoetpad (genoem na Jan Smuts wat dié pad nog gereeld kom stap het toe hy al in die sewentig was) langs tot by die bopunt van Platteklipravyn. Of, as jy ’n permit vir die Oranjekloofreservaat op die Agtertafel het, kan jy by die Woodheaddam regs draai en via Disasloep tot by Constantianek afstap.
Parkeerplek Los jou voertuig by die Glen-parkeerterrein aan die bopunt van Kloofnek. Jy kan ook in Bakoven parkeer – sien die Woodyravyn op bl. 35.
Leeukop
Tafelberg en Leeukop se roetes begin min of meer op dieselfde hoogte bo seespieël, maar Leeukop is sowat 400 m laer en die roete is ook glad nie so steil óf lank nie. Die voetpad krul in ’n spiraal om die kop en dit neem sowat ’n uur om tot bo by die baken te stap.
Dis waarskynlik die toeganklikste en daarom gewildste roete. ’n Mens kan op ’n Saterdagoggend kletsende stapmaats, ernstige drawwers én gesinne met honde aantref.
Vir die eerste kilometer stap jy met ’n breë tweespoorpad langs, waarna die pad smaller en klipperig raak. Hier is kort-kort ’n bankie vir die kortasems en ’n mens wíl eintlik gaan sit, want die uitsig verander gedurig.
Op een steil plek help ’n paar kettings stappers om teen die rotse op te klouter. Daar is egter ’n makliker alternatief (wat net ’n tikkie langer is) vir diegene wat nie vir die kettings kans sien nie. As jy by die eerste ketting kom, hou links verby op die duidelik uitgetrapte voetpad.
Van heel bo af het jy ’n 360°-uitsig oor die stadskom, Robbeneiland, die Gewelberge en Clifton se strande.
Parkeerplek Draai aan die bopunt van Kloofnekweg regs op die Vlaebergpad. Parkeer by die Wendyhuisie sowat 600 m verder en volg die tweespoorgrondpad teen die helling op.
Wat nog? Dis tradisie om Leeukop met volmaan uit te stap. Onthou jou koplampie! >