LUILEKKER SLENTERS
Leeukop-sirkelroete
Waar die bekende staproete teen Leeukop uit na links wegspring, hou jy regs – teen ’n paar trappies op – in die rigting van Vlaeberg. Die voetpad loop die eerste 800 m parallel met die teerpad tot by ’n grafkelder
(sien kassie).
Van hier af sak die voetpad links van die grafkelder af tot by ’n T-aansluiting met ’n ander een wat van Seepunt se kant af aankom. Hou hier links, al bo die huise van die buurte Fresnaye en Bantrybaai langs. Naderhand stap jy deur ’n klossie bome – kyk op na die rotskoepels hier links van jou – dis éintlik Leeukop se mooiste kant.
Anderkant die bome verras ’n mooi uitsig oor Clifton se strande jou voordat die roete weer stelselmatig klim. Rondom 3,5 km is daar ’n vurk in die pad – hou hier links teen die trappies uit tot waar ’n bankie in die koelte van dennebome ’n welkome blaaskans verseker. Hierna is dit ’n kort entjie deur suikerbosse en proteas tot waar die voetpad by die Kloofweg-teerpad aansluit.
Stap nou wakker – hier’s ’n paar blinde draaie tot by die Kloofnekkruising.
By die kruising swenk jy saam met die Vlaebergpad terug teen die berg op, en sowat 250 m verder klim jy met sementtrappies op linkerhand terug tot op die voetpad. ’n Laaste stewige bultjie en jy is terug by die beginpunt.
Nou kan jy ’n koffie bestel en onder die bloekombome aan die stad se kant van die Vlaebergpad gaan sit en kyk hoe die mensdom doer onder woel.
Wag, “koffie bestel”? Dis reg, hier’s deesdae ’n koffietrokkie van Vida e Caffè!
Parkeerplek Langs die Vlaebergpad. Mik vir die begin van die bekende Leeukoproete (daar’s ’n bordjie).
Die Pyppad
Dié roete bo Kampsbaai lei jou nou wel nie tot bo-op die berg nie, maar dis gelyk en maklik vir ’n oggenduitstappie. Hier’s min skaduwee, sorg dus dat julle vroeg wegspring en dra genoeg water saam.
Die tweespoorpad is in 1887 gebou toe ’n pypleiding met akwadukte hierlangs aangelê is – al die pad van Disasloep teen die Agtertafel, deur die 700 m lange Woodheadtonnel (die 1 300 m lange Geweltonnel het dit in 1960 vervang) tot by die Moltenoreservoir in Oranjezicht.
Die paadjie hou al op ’n kontoer langs, met die blou baaitjies van Kampsbaai en Bakoven wat tussendeur hoë dennebome vir jou wink. Plek-plek stap julle op of langs die groot ou waterpype en die akwadukpilare verby.
Ná sowat ’n uur se stap moet jy die berg mooi bekyk vir Penny’s Cave in die Fonteinravyn. Die storie loop dat ’n Amerikaner, Joshua Penny, teen sy sin gedwing is om in die Britse Vloot op skepe te dien. Maar in 1795 het Penny van die HMS Sceptre ontsnap toe dié in Tafelbaai voor anker gelê het. Hy het 14 maande lank in die berg weggekruip, net om uit te vind dié skip het enkele weke ná sy ontsnapping gesink.
Ná sowat 4 km word die tweespoorpad ’n enkelspoorpaadjie waarmee jy uiteindelik tot op die Grootkoppiek (in lyn met die Twelve Apostles-hotel) kan stap. Maar jy hoef nie – besluit self hoe ver jy wil gaan en draai dan op jou spoor terug.
Parkeerplek Op linkerhand nes jy van die Kloofnekkruising af in Tafelbergweg links gedraai het.
Deer Park-sirkelroete
Hierdie reservaatjie aan die roksoom van Tafelberg is oor naweke ’n kuierplek vir stedelinge met fietse, honde, kinders of gedagtes wat nie wil afskakel nie. Van die parkeerterrein af swenk ’n voetpad eers af teen die helling, maak ’n kinkel en volg dan die Platteklipstroom teen die berg uit.
Dit klink na ’n kwaai klim, maar houtbruggies help vir vastrapplek op glibberige kolle. Dis in dié stroom se waters dat die slawe aan die Kaap in die ou dae kom wasgoed doen het – vandaar die naam “Platteklip,” wat verwys na die breë klipbanke in die stroom waarop hulle die wasgoed oopgeskud het om droog te word.
Bly teen die stroom totdat jy bó die bome uitkom en op ’n kontoer op ’n breë tweespoor na links swenk.
Blaaskans! Draai om en kyk hoe blink die wolkekrabbers se glasvensters in die son. En neem in die somer foto’s van die plate pienk watsonias wat weerskante van die pad groei.
By ’n vurk in die pad hou jy regs op die tweespoor, maar bly aan die linkerkant van die pad, want drawwers en fietsryers kom met ’n hengse spoed hierlangs af! ’n Taamlike gelyk 2 km volg, met die stad op links en die berg op regs, tot waar die roete reg in lyn met Oppelskop skerp afswenk na Vredehoek se huise toe. Mooi trap! Dié sanderige bultjie is lief vir basvelle.
Hou nou net al die pad links, deur ’n gordel dennebome, en steeds reguitaan tot terug by jou motor. En dan is dit tyd vir ’n welverdiende ontbyt by die Deer Park Café ( 021 462 6311) af in die straat.
Parkeerplek Aan die bopunt van Deerparkrylaan, Vredehoek. Dis ’n dubbelpad – hou links. Die hek is oop van sonop tot sononder.