RUIGTES VIR BALJAAR
Ceciliabos
Dié stukkie berghang, genoem na Cecil John Rhodes, is voorheen vir kommersiële plantasies ingespan. Die strook inheemse afro-gematigde woud wat langs die rivier oorgebly het, word vandag streng beskerm.
Die Spilhausravyn met sy poele en rooiels- en assegaaibome is maklik bereikbaar. As die kinders ’n bietjie ouer is en vir die steiltes kans sien, kan julle die Ceciliaravyn oorweeg en tot by die waterval aan sy bopunt stap (dis sowat ’n uur se stap van die parkeerterrein af ). Die verknotte bome en druppende mosbaarde laat ’n mens soos ’n elf in The Lord of the Rings voel.
Parkeerplek By die kruising van Rhodesrylaan en Hohenortlaan, Constantia.
Oranjekloof
Dié beboste ravyn is die enigste deel van die berg waarvoor jy ’n permit moet hê – die afro-gematigde woudspesies en ander inheemse plante word beskerm. Die rooidisa blom in die laatsomer hier.
Die Oranjekloof-gebied het ’n paar roetes, maar die skaduryke Disasloeproete is die mooiste. Dit begin by die Constantianek-parkeerterrein. Maak seker jy volg die pad na links. Ná sowat 200 m behoort jy ’n aanwyser van die Hoerikwaggo-staproete te sien – volg dit.
Die helling deur die inheemse woud klim vir sowat 4 km geleidelik tot aan die onderpunt van Disasloep. Die klim vra mooitrap – die mosoortrekte rotse is glad! Die sloep is die ene watervalletjies en rotspoele en aan die bopunt wag nog ’n verrassing: die 50 m hoë klipwal van die Woodheaddam. Hóm hoef jy darem nie ook uit te klim nie – daar is trappies teen die linkerkant van die klofie uit. Parkeerplek Die Constantianek-parkeerterrein. Permit Slegs 12 stappers word per dag in Orangekloof toegelaat en jy moet ’n (gratis) permit hê. Skakel 021 422 1601 om een te reël.
Jy ontvang dit per e-pos en moet die permit saamdra ingeval ’n veldwagter binne die reservaat jou daarvoor vra.
Kirstenbosch
Dié botaniese tuin is die kroon van die Kaapse blommeryk met ’n verskeidenheid van ongeveer 7 000 inheemse, unieke en bedreigde plantspesies. Die meeste mense kom hierheen om met ’n boek onder ’n boom te lê, oor die Boomslang-wandelbrug te loop of ’n skemeraandkonsert by te woon, maar die tuin bied ook vele opsies vir toonklap.
Die Brailleroete is slegs 450 m lank en is ’n goeie manier om kleuters te wys watter wonders jy te voet kan sien. Dit moedig jou aan om al jou sintuie in te span – jy voel aan die boomstamme en luister na die geritsel van paddas en voëls in die plantegroei.
Gesiggestremdes volg ’n gidstou van een punt na ’n volgende. ’n Stopblok in die tou dui aan waar ’n inligtingsbordjie staan, met interessante feite in Braille sowel as grootskrif. Hier is sithoekies vir bene rus en ’n spuitkraan om jou waterbottel vol te maak.
Parkeerplek Aan Rhodeslaan (die M63), tussen Nuweland en Constantianek.
Oop September tot Maart 8 vm.-7 nm.;
April tot Augustus van 8 vm.-6 nm.
Prys R75 p.p. (R20 per kind, gratis vir kinders jonger as 6.) Koop ’n kaartjie by webtickets.co.za
Kontak 021 799 8782; sanbi.org
weg.co.za
Nuwelandbos
Daar is áltyd skaduwee en bergstrome in die Nuwelandbos wat dit ’n heerlike speelplek vir kinders en honde maak.
Daar is ’n maklike roete wat van die parkeerterrein af stroomlangs tot op die Houtkapperspad loop. Kinders haak altyd eers by die Nuwelandbrandweerstasie neffens die parkeerterrein vas en vergaap hulle aan die helikopters. Van daar af hou ’n mens links tot oor die Nuwelandstroom en teen die oorkantste oewer langs op met die houttrappies.
Dis ’n matige opdraande deur die koel dennewoud. Sowat 500 m verder is ’n klipbrug waar jy kan piekniek hou en in die poel onder ’n waterval kan afkoel. Daarna kan jy die stroom oorsteek en met die Littlewort-voetpad terugstap na die parkeerterrein. Maar as jy ongeskonde natuurskoon aan dié kant van die berg wil sien, sal jy nog ’n entjie moet aanstoot: Stap oor die klipbrug en draai links by die bankie aan die oorkant. Volg dié paadjie deur die inheemse woud. Wees op die uitkyk vir die wildeperskebome en goue wawielspinnekoppe wat hulle groot webbe tussen die takke span.
Parkeerplek Langs die Nuweland-brandweerstasie in Unielaan.
Wat nog? Die vrywillige brandbestryders hou elke jaar in November ’n aksiebelaaide ope dag. Hulle wys hoe hulle brande blus en die jongspan kan op die brandweerwaens ry! vws.org.za >