Kerrieviskoekies
Maak sowat 24 koekies Bereidingstyd 35 minute Gaarmaaktyd 15 minute
Kerrievis is ’n Paastradisie. Hier’s ’n manier om kerrievis te rek.
Jy benodig
• 3-4 groot aartappels, geskil en
in blokkies gesny
• ’n knippie elk bakpoeier en sout • 3 eetlepels warm room
• 500 g gekoopte kerrievis met sous (ons het Woolworths s’n gebruik)
• ½ koppie meel
• 2 eiers, geklits
• 1 koppie droë broodkrummels • olie vir vlakbraai
Só maak jy
1 Kook die aartappelblokkies in soutwater tot net-net sag. Dreineer en plaas dit terug op die hitte om droog te stoom. Roer die bakpoeier, sout en room by en druk die aartappel fyn met ’n vurk of aartappeldrukker om ’n stywe kapok te maak. Laat dit afkoel.
2 Skep die vis uit die kerriesous (hou die sous eenkant) en vlok die vleis met twee vurke. Meng die fyn vis deur die kapokaartappel. Hou die verhouding dop – jy wil dubbel soveel aartappel as vis gebruik, maar nie meer as dít nie.
3 Verdeel die aartappelmengsel in 24 ewe groot happiegrootte bolletjies. Druk die bolletjies effens platter en rol dit dan eers in die meel, dan in die eier en laastens in die broodkrummels.
4 Verhit die olie in ’n pan en braai die koekies tot mooi goudbruin en bros. Sit dit voor met die kerriesous.
Lamsribrol met eiervrug
Genoeg vir 6
Bereidingstyd 20 minute Gaarmaaktyd 1 uur en 30 minute
Bykosse soos gebraaide eiervrug, platbrode en komkommerslaai komplementeer lam heerlik.
Jy benodig
• 1 ontbeende lamsrib van sowat 1 kg
• 1 eetlepel bruinasyn
• 1 teelepel koljander, fyngestamp • sout en varsgemaalde swartpeper na smaak
• 300 g lamswors (of gebruik
lamsmaalvleis wat jy self geur)
• 2 middelslag-eiervrugte
• 3 eetlepels olyfolie
• 1 teelepel gerookte paprika
• ’n stewige knippie fyn komyn
• 1 blik (410 g) kekerertjies
• 2 eetlepels granaatkonsentraat • vars kruie soos ment en koljander
na smaak (opsioneel) • suurlemoensap om voor te sit
(opsioneel)
Só maak jy
1 Sit die rib met die vetkant na onder op ’n skoon snyplank en vryf dit oraloor met die asyn, koljander, sout en peper in. Druk die worsvleis uit die derm en sit dit in die lengte van die rib in die middel. Vou nou die rib sorgvuldig oor die worsvulsel en bind dit met toutjies vas om ’n netjiese rol te vorm.
2 Braai die lamsrol vinnig oor warm kole sodat die vleis net eers ’n kleurtjie kan kry. Skuif die rooster dan hoër en braai dit vir nog sowat ’n uur stadig totdat die vleis sag en die vetlagie bros is. (Des te beter as jy ’n rotisseriemandjie het – dis die perfekte manier om só ’n snit te braai omdat jy die vleis nie heeltyd hoef dop te hou nie. Alternatiewelik kan jy die rol ook met min moeite stadig in ’n ketelbraai gaarmaak.)
3 Prik die eiervrugte oraloor met ’n vurk en braai dit ook oor warm kole vir ongeveer 45 minute of tot die vleis sag is (’n paar leksels vlamme sal nie skade doen nie!). Haal die eiervrug van die hitte af en laat dit effens afkoel.
4 Sny die eiervrugte in die lengte middeldeur, skep die vleis uit
(wees versigtig sodat die skilhelftes heel bly) en braai dit in ’n bietjie olyfolie saam met die paprika, komyn en kekerertjies tot geurig. Geur dit na smaak met sout en peper en skep dit as ’n vulsel terug in die eiervrugskille of in ’n mooi
opskepbak. Dis heerlik saam met die gebraaide lam, opgedollie met ’n skeutjie granaatkonsentraat, vars ment en koljander. En, natuurlik, ’n lekker skeut suurlemoensap.
Varkneksosaties met tamatie
Genoeg vir 6
Bereidingstyd 10 minute plus marineertyd
Gaarmaaktyd sowat 15 minute (afhangende van die grootte)
Baie mense is lief vir ’n kerriesosatie. Maar het hulle al jóúne geproe? Dié marinade is in ’n klas van sy eie!
Jy benodig
• 1 kg varknek, in blokke gesny • ’n paar lourierblare
VIR DIE MARINADE
• ½ koppie tamatiesap
• 1 klein rooiui, fyngekap
• 2 eetlepels suurlemoensap • 3 knoffelhuisies, gekap
• 2 eetlepels vars pietersielie, fyngekap (of gebruik ’n ruim knippie droë pietersielie)
• 1 eetlepel olyfolie
• 1 eetlepel braaisout
• 2 eetlepels appelkooskonfyt
Só maak jy
1 Meng al die bestanddele vir die marinade in ’n glas- of emaljebak. Pak die vleis daarin, meng dit deur tot die vleis oraloor bedek is, en maak die bak styf toe met ’n deksel of kleefplastiek. Laat dit vir minstens ’n uur in die yskas staan. Draai die vleisblokkies elke nou en dan om.
2 Ryg die vleisblokkies op dik sosatiestokkies met ’n lourierblaar tussenin vir die mooi. (Onthou om die stokkies vooraf in water te week sodat dit nie oor die kole vlam vat nie.)
3 Braai die sosaties oor redelike warm kole sodat die marinade lekker goed kan skroei en karamelliseer. Sodra die vleis gaar is (dit neem gewoonlik 10-12 minute, afhangend van die hitte en grootte van die sosaties), kan jy dit afhaal en vir ’n paar minute in ’n skottel laat rus voordat julle opskep.
Fynslaai
Genoeg vir 6 Bereidingstyd 10 minute
’n Mengelmoes van kleur lyk vars en dis ’n manier om al daardie laaste goedjies in jou yskas se groentelaai te gebruik. Pas gerus die hoeveelhede aan na gelang van wat jy beskikbaar het.
Jy benodig
• 2 wortels, geskil
• 4 murgpampoentjies
• 5 radyse
• 2 hande vol babaspinasieblare • 2 eetlepels granaatpitte
• 3 eetlepels olyfolie
• 1 eetlepel witwynasyn
• 1 teelepel elk dijonmosterd en heuning
• ’n knippie vars kruie soos basilie
of pietersielie (opsioneel)
• sout en varsgemaalde swartpeper na smaak
Só maak jy
1 Gebruik ’n skerp kombuismes en kap die wortels, murgpampoentjies en radyse in klein blokkies. Meng dit goed deur en skep dit in ’n slaaibak.
2 Sny nou ook die spinasie fyn en roer dit deur die slaai. Strooi laastens die granaatpitte oor.
3 Gooi die res van die bestanddele saam in ’n skroefdopflessie en skud dit goed. Proe om seker te maak die geurbalans is na jou smaak, of pas aan soos nodig en giet dit dan oor die slaai. ’n Paar brokkies fetakaas bo-oor sorg vir ’n mooi afronding.
Karamelpatat met neute
Genoeg vir 6 Bereidingstyd 10 minute Gaarmaaktyd 45 minute Oondtemperatuur 200 ºC
Hierdie bygereg se sous is die deurslaggewende faktor!
Jy benodig
• 4 middelslag-patats, geskrop
maar nie geskil nie
• 2 eetlepels olyfolie
• ½ koppie bruinsuiker
• ½ koppie kookwater
• 2 eetlepels botter
• ’n knippie elk kaneel en
rissievlokkies
• 3 eetlepels room
• 100 g gemengde neute
Só maak jy
1 Voorverhit die oond. Sny die patats in happiegrootte ronde skywe, meng dit met die olyfolie en sprei die skywe in ’n enkellaag in ’n oondbak uit. Rooster dit vir 45 minute of tot goudbruin buiteom en sag binne. Wikkel en dop die skywe elke 15 minute om om seker dit maak dit karamelliseer reg rondom. (Jy kan die patat ook in foelie toedraai en dit dan oor die kole rooster.)
2 Verhit die suiker en water in ’n potjie op die stoof en roer dit tot die suiker oplos. Voeg die botter en speserye by, bring tot kookpunt en kook totdat die stroop ’n ligte karamelkleur kry. Wakker staan – dit gebeur voordat jy jou oë kan knip! Roer vinnig die room en neute by en skink oor die gaar patat. >