VOLKSWAGEN BOBAAS BY CARS.CO.ZA-TOEKENNINGS
Volkswagen het onlangs die gesogte titel Handelsmerk van die Jaar ontvang by Cars.co.za se verbruikerstoekennings, wat gedryf word deur WesBank. Die wenners in 13 kategorieë is by ’n spoggerige geleentheid by die Kyalami-renbaan gekroon. Die gasheer vir die aand was die TV-persoonlikheid Bonang Matheba.
#CarsAwards is een van die topvoertuigtoekennings in die land. Sedert die instelling van die pryse in 2015-’16, het #CarsAwards ontwikkel tot SA se invloedrykste toekenningsgeleentheid. Sedert 2017 word die program trots ondersteun deur WesBank, die grootste verskaffer van voertuigfinansiering in Suid-Afrika.
“As Suid-Afrika se grootste voertuig- en batefinansier, wil WesBank onsself verbind tot inisiatiewe wat die bedryf beïnvloed, veral programme wat waarde vir die verbruiker bied,” het Lebogang Gaoaketse, WesBank se hoof van bemarking en kommunikasie, gesê.
Volkswagen was die ster van die aand. By die vorige vier #CarsAwards is Suzuki en Toyota elkeen twee keer as die Handelsmerk van die Jaar aangewys. Vanjaar het Volkswagen egter die prys opgeraap. Dié trofee word suiwer gegrond op mark- en verbruikersinligting. Volkswagen het met ses trofeë weggeloop (BMW en Toyota het elkeen twee gewen) en is in totaal – met 16 trofeë – die voorste pryswenner by die #CarsAwards.
Verteenwoordigers van die Volkswagen Amarok, Arteon en
Polo, die Toyota Fortuner en die Suzuki Swift het almal hulle kategorie suksesvol verdedig nadat hulle ook by die 2018-’19 #CarsAwards met die louere weggestap het. Die Amarok en die Swift het dit egter met ander modelle gewen as verlede jaar.
Die Volkswagen Amarok en die Toyota Fortuner het nou hulle onderskeie kategorieë – Luukse dubbelkajuit en Avontuur-SNV – drie jaar agtereenvolgens gewen. Suzuki het (met ’n ander model van die Swift) vir die vierde jaar agtereenvolgens die prys gewen vir die
Sakpasmotor van die Jaar.
In vyf van die 13 kategorieë het die beoordelaars se gunstelinge nie gewen nie omdat die inligting van die Cars.co.za-eienaarstevredenheidspeiling deurslaggewend was.
Sewentien handelsmerke is onder die finaliste verteenwoordig. Volkswagen het sewe benoemdes gehad, BMW, Ford en Toyota elkeen vier, en Mazda en Suzuki elkeen drie. Die Chinese handelsmerk Haval was die eerste keer ’n finalis by die #Cars Awards terwyl Jaguar en Land Rover weer onder die finaliste getel het nadat hulle in 2018-’19 nie die finale ronde gehaal het nie.
Soos ander jare is die galageleentheid uitgesaai op Twitter, Instagram, Facebook en regstreeks na Cars.co.za se YouTube-kanaal gestroom, wat nou meer as 190 000 intekenaars het. Die uitsending het verbruikers, wat sentraal staan tot die Cars.co.zatoekennings, toegelaat om aktief deel te neem aan die geleentheid.
Gaan na carsawards.co.za