Botswana, Okavangodelta,
Kom saam met Bhejane Adventures op ’n selfrytoer deur Noord-Botswana, die Zambesistreek in Namibië en Vic Falls in Zimbabwe. Jy bly in lodges, op ’n huisboot en selfs in ’n boomhuis!
Dié fantastiese safari begin in Nata en eindig in Kasane. Ons ry oor die wye sandvlakte wat eens die groot mere van Suider-Afrika was, gevoed deur selfs magtiger riviere. Oor die eeue heen het Moeder Natuur die riviere en die landskap verander.
Ons ry wes van die Makgadikgadipan af, om die suidelike punt van die Okavangodelta, en dan noord langs die Okavangorvier na die ou Caprivistrook in Namibië. Dan volg die Zambesistreek oor die geheimsinnige Tsodilo-koppies met interessante rotskuns. Ons mik wes deur die Zambesistreek terug na Botswana vir ’n vaart op die Choberivier voordat ons meer oos draai na die Victoriawaterval in Zimbabwe.
Die toer word gelei deur ’n ervare bewaringskundige en avontuurgids wat ten alle tye in radioverbinding met die groep is. Die gidse deel hulle natuur-, kulturele en geskiedeniskennis, asook 4x4-ryvernuf. (Die toer is moontlik in ’n 4x2 met goeie grondvryhoogte; ’n 4x4 is nie noodsaaklik nie.)
Ons gesoute bossjef berei drie maaltye per dag voor. Vars slaaie, potjiekos en braai is van die geregte op die spyskaart. Die koffiepot sal elke dag al om 6 vm. al prut.
Hierdie is nie ’n kamptoer nie – blyplekke is in gerieflike lodges, twee nagte op ’n huisboot op die Okavangorivier en drie nagte in boomhuise op die oewer van die rivier.
Die lodges het almal kontantkroeë.
Kom geniet die ervaring van ’n leeftyd!