5 lekker Dinokeng-plekke
As jy op ’n Vrydagmiddag op die N1 klim en jou ryding se neus noord van Pretoria druk, kan jy ’n uur later by ’n grootvyfreservaat inry. Dinokeng is op jou drumpel.
1 Ontspan in die swembad by Tranquillity Spa Lodge
As jy al by ’n watergat in ’n wildreservaat gesit en jaloers word het op die diere se koel lafenis, wag hier ’n besonderse ervaring op jou. By Tranquillity kan jy jou skemerkelkie in ’n swembad drink terwyl jy die wild by die watergat oorkant die swembad dophou. Tranquillity het ses luukse chalets en drie kleiner chalets wat jou ’n boskampgevoel gee. Vir kampeerders is hier ses staanplekke. Jy eet al jou etes by die restaurant (kampeerders kan natuurlik self kos maak), en die spa-geriewe is hemels.
tranquillityspalodge.co.za
2 Bekeer die nie-kampeerders by Willem’s Rus
Die 25 staanplekke hier is ’n kampeerder se droom! As jy ’n nie-kampeerder in jou lewe het, kan jy hulle hier kom inlyf in die kampding, want hier is groen gras, silwerskoon geriewe én ’n swembad. Saans sal hulle verlief raak op die geluid van brullende leeus en tjankende jakkalse. Staanplekke 1, 2 en 3 is weggesteek en moet saam bespreek word. Dié staanplekke deel ’n boma, ablusiegeriewe en ’n buitestort. Dit is dus ideaal vir vriende wat saam wil kamp. Staanplek 4 en 5 het die beste uitsig oor die watergat. Al die staanplekke het krane en hope kragpunte.
willemsrus.co.za
3 Hou ’n tweede wittebrood by Mooiplasie
Hier is nege kothuise, met ’n swembad en ’n buiteborrelbad – dis perfek vir paartjies. Hier is ook ’n groot slaapsaal as jy vriende wil nooi vir jou 40ste verjaarsdag. Hier is een wilderniskampplek wat ’n entjie weg van die hoofkamp is – dié kampplek is slegs vir 4x4’s.
dinokengreserve.co.za (klik op ‘Where to stay’)
4. Bring die gesin na Tshikwalo Lodge
Hier is 12 chalets wat slaapplek het vir twee tot vier mense, een uitsluitlik vir vier mense en twee groter eenhede wat tot 10 mense kan huisves. Laat die kinders in die swembad baljaar terwyl jy jouself in ’n lêstoel tuismaak. Saans kan jy aandete in die restaurant eet, wat op ’n verligte watergat uitkyk. Groot groepe (tot 20) kan die afsonderlike Tswikhalogastehuis bespreek, en hier is ook 30 kampplekke.
tshikwalogamelodge.co.za
5 Brou in die reservaat
’n Mens hoor nie aldag van ’n bierbrouer in ’n wildreservaat nie, maar Arlington Brewery & Cidery is inderdaad hier gevestig. Maak jou in die eetplek tuis en gee jou oor aan ’n Bushveld Bliksem Lager terwyl jy wag vir jou pizza, burger of steak. Tjorts!
arlingtonbeer.co.za ONTHOU: Dinokeng-wildreservaat werk nie heeltemal soos ander reservate nie. Dit bestaan uit ’n paar private instellings; dus gaan jy plek-plek voor ’n toe hek moet omdraai. Die meeste van die verblyf is selfsorg – bring als saam wat jy nodig mag kry. By hulle winkelkompleksie, Safari Mall, kan jy basiese goed soos vuurmaakhout koop.