Groot getalle
Lank leef dié diere!
In mensjare is 100 ’n rype ouderdom, maar vir sommige van dié diere is ’n eeu hulle kinderjare!
507
Die oseaan- quahog is ’n soort gapermossel wat 400 jaar of ouer kan word as hulle nie geoes word nie. In 2006 is ’n besonderse een in Ysland gevind: Wetenskaplikes het die groeiringe op sy skulp getel en bevind dié diertjie is 507 jaar oud! Dit het hom die bynaam Ming besorg, omdat hy al sedert China se
Ming-dinastie leef!
400
Die groenlandhaai is die oudste werweldier waarvan ons weet. Na raming is daar een van hulle wat al vier
eeue lank in die see rondswem!
226
’n Koivis in Japan genaamd Hanako het só oud geword.
(Die meeste koivisse lewe gemiddeld 30 jaar.)
200
Dís die geskatte lewensduur van ’n Groenlandse walvis ( Balaena mysticetus). Een is al selfs gevind met ’n harpoenkop in sy spek wat uit die 1800’s dateer!
152
Die ouderdom van die enorme Galápagos-skilpad Lonesome George toe hy in 2012 gevrek het. Hy is so genoem omdat hy glo nie van vroulike skilpaaie se
geselskap gehou het nie.
106
Die langvinseepaling kom voor in Nieu-Seeland en kan meer as 100 jaar leef. Wetenskaplikes glo dit is omdat
hulle so stadig groei (2 cm per jaar).
70
’n Afrika-olifant se lewensverwagting. Soos hulle sê, ’n
olifant vergeet nooit nie…
∞
Dan is daar die Turritopsis dohrnii, ’n soort jellievis wat onsterflik is. Wag, hoe nou? Hulle kan biologies nie vrek nie. As die jellievis seerkry, genees hy en keer terug na ’n jong toestand. Maar – soos ander diere – sal die
jellievis vrek as hy gevreet word of aan ’n siekte ly. Maar indien hy súlke ongelukkies kan vermy, sal hy net
eenvoudig aanhou leef. Bisar!