Hoenderslaai met bloukaassous
Genoeg vir 4-6
Bereidingstyd 30 minute plus 1 uur pekeltyd
Gaarmaaktyd 15 minute
Jy benodig
• 6 dik hoenderborsfilette • 2 eetlepels olyfolie
• 2 eetlepels braaisous
VIR DIE PEKEL
• ¼ koppie Funky Ouma-braaisout (of gebruik ’n mengsel van ¼ koppie seesout, 3 heel peperkorrels en ’n knippie elk komyn, koljander, rissiepoeier, knoffel en paprika)
• 1 koppie kookwater
• 1 koppie ysblokkies
• 2 roosmaryntakkies
VIR DIE SLAAISOUS
• 80 g romerige bloukaas
• ½ koppie suurroom of
karringmelk
• ’n knippie suiker
• 1-2 eetlepels witwynasyn
• 1 teelepel mosterd
• ’n mespunt vars knoffel,
fyngedruk
• 1 eetlepel vars grasuie, gekap
VIR DIE SLAAI
• 1 groot cos-slaaikop,
blare kleiner geskeur
• 1 koppie mieliepitte
(lekker oor die kole gebraai!)
• 2 avokado’s, in blokkies gesny en
suurlemoensap bo-oor gedrup • 1 klein rooiui, in ringe gesny
Só maak jy
1 Maak die pekel deur die sout deur die kookwater te roer tot amper al die korrels opgelos is. Voeg dadelik die ys by om die mengsel tot kamertemperatuur af te koel. Voeg die hoender en roosmaryn by die pekel en laat dit vir 1 uur in die yskas staan. (Jy moet die vleis heeltemal met vloeistof bedek; sit ’n bord met iets swaars bo-op die hoender om dit onder die water te hou.)
2 Dreineer die hoender en klad die hoenderstukke met ’n vadoek droog. Braai nou die hoenderborsies in die olie of oor die kole tot goudbruin. Verf die braaisous aan en braai dit nog ’n minuut of twee tot dit gaar en lekker taai is.
3 Klits die slaaisousbestanddele saam tot glad.
4 Meng ’n groot skep van die slaaisous deur die blare en pak dit saam met die res van die slaaibestanddele op ’n groot opdienbord. Sny die hoender in skyfies en rangskik dit bo-op. Sit die slaai saam met die res van die slaaisous voor en laat elkeen homself help.
WENK Brosgebraaide spek, geroosterde croutons en gekookte eiers werk goed in dié slaai.