’N ‘SPORTNUTS’ WAT JOU SAK PAS
Die nuwe Renault Triber het sewe sitplekke, hope binneruimte, goeie grondvryhoogte en jy gaan nie veel meer vir hom betaal as vir ’n intreevlakmotor nie. Waar’s die haakplek, vra Pierre Steyn.
Renault kry dit reg om in twee segmente in die Suid-Afrikaanse mark te baklei, en dit dra by tot die goeie verkope wat dié Franse vervaardiger die afgelope jare hier behaal. In die een segment verkoop hy gesofistikeerde Europese modelle soos die Koleos, Megane, die Clio en tot ’n mate die Duster, en in die ander goedkoop “Derdewêreldmotors” soos die intreevlak-Kwid, die Sandero en nou die nuwe Triber.
Die Triber is ’n basterbrakkie – bietjie luikrug, baie gesinsbussie en ’n leksel sportnuts. Met sy moderne ontwerp en LED-ligte skort nie veel nie, en binnelangs bied hy moderne geriewe soos Apple CarPlay en Android Auto. Hoewel Renault daarmee spog dat dit ’n sewesitplekmotor is, is daai agterste twee sitplekke slegs vir noodgevalle wanneer jy die helfte van die o.10C- sokkerspan na ’n wedstryd moet vervoer.
Gelukkig kan jy maklik sitplekke rondskuif (Renault beweer daar is 100 moontlike sitplekkonfigurasies) en die bussie maak veel meer sin as ’n vyfsitplekmotor.
Ons het die Triber met sy bekendstelling op agterpaaie tussen Durban en Pietermaritzburg gery, en sy padgedrag was veel beter as wat ons van ’n intreevlakmotor verwag het.
Maar dieselfde toetsrit het ook beklemtoon hoekom dit beter sou wees om nie die Triber met sewe volwassenes vol te prop nie. Selfs met net ’n bestuurder en een passasier aan boord, het die 1.0 liter-driesilinderenjintjie
(hier is geen sprake van ’n aanjaer nie) hard asemgehaal teen die bulte.
Daar is net soveel wat jy van 52 kW se krag en 96 Nm se wringkrag kan verwag, en wonderwerke is nie een van hulle nie. Jou linkerhand gaan gereeld die rathefboom tussen vyfde en vierde rat moet roer om momentum te behou.
Anders as die flou enjin skort daar nie veel met die Triber nie. ABS-remme en lugsakke voor is standaard, en die duurder Prestige-model het ook kantlugsakke. Met die Triber gaan Renault sy stamboom aansienlik vergroot.