VEELSYDIGE STAATMAKER
WIELE – MITSUBISHI ASX
“In kriekettaal is die ASX ’n allrounder, ’n veelsydige speler wat ’n bietjie van alles kan doen sonder om noodwendig uitstekend in die een of die ander te wees.”
Die opgekikkerde Mitsubishi ASX is nóg vis nóg vlees. Dis ’n ietsie van alles – ’n bietjie sportnuts, ’n bietjie stadsmotor, ’n bietjie luuks... en báie betroubaar.
Baie seuns hang plakkate van hulle gunstelingmotors teen ’n slaapkamermuur... Maar die Mitsubishi ASX gaan nie bo enige skoolseun se bed pryk nie. Nie eens Mitsubishi sou daaraan dink om ’n plakkaat van die ASX te druk nie – dis eenvoudig nie daai soort motor nie.
As die ASX ’n krieketspeler was, sou hy nooit die boulwerk geopen het nie. Ook nie eerste of tweede op die kolflys wees nie. Dié outjie sou sesde of sewende gekolf het, en eers boul wanneer die ander boulers doodmoeg is.
In kriekettaal is die ASX ’n “allrounder,” ’n veelsydige speler wat ’n bietjie van alles kan doen sonder om noodwendig uitstekend in die een of die ander te wees. So af en toe kry jy ’n frats wat briljant kan kolf, boul en veldwerk doen, maar helaas, die ASX is nie die Jacques Kallis van die motorwêreld nie.
Jy kan wel op die ASX se nommer druk. Hy is betroubaar sonder fieterjasies of ’n enorme ego. As jy hom vra om iets te doen, doen hy dit gewillig. Dís wat ’n mens deesdae ’n “crossover” noem, ’n middelslag- voorwielaangedrewe gesinsmotor met redelike grondvryhoogte wat gemaklik in die stad rondry.
Die 2 ℓ-enjin (sonder ’n aanjaer) en die palwisselspoedratkas is bedoel om jou harttempo laer eerder as hoër te kry. Met net
110 kW se krag en 197 Nm se wringkrag gaan jy soos ’n zenmeester pleks van ’n Sarel van der Merwe van die kleuterskool na
Woolies in die dorp pendel.
Maar as jy sy agterste ry sitplekke platslaan, is daar ruimte vir jou bergfiets en kamptoerusting.
Die ruimte binne-in die motor is beslis een van sy pluspunte. Die gemak van sy leersitplekke is nog ’n voordeel.
Ek het al in motors gesit wat vier keer meer kos waar my rug binne die eerste 30 minute begin styftrek. Nie in die ASX nie. Die afwerking en raakoppervlakke binnelangs is harde plastiek, maar dit is ordentlik aanmekaargesit. Daar is twee USB-proppe voorlangs, en jou slimfoon en die motor se vermaakstelsel, of dit nou Apple Car Play of Andriod Auto is, maak vinnig vriende. ’n Groot lekkerte is die panoramiese sondak wat van voor na agter strek.
Die ASX se voorkoms is mooi reggetrek. Dit lyk nou asof hy deur ’n kunssinnige ninja met ’n katanaswaard bygekom is, die ene skerp hoeke en diep groewe. Hy spog ook met nuwe LED-ligte voor en agter. Die ASX gaan nie plaaslik eerste kom in ’n skoonheidskompetisie nie, maar dit lyk darem ook nie meer asof jy ’n motor uit die jaar toet bestuur nie.
Soos met baie van Mitsubishi se motors gaan jy jou voor die tyd moet afvra wat jy in ’n ryding soek. As jy ’n kunswerk op wiele soek wat koppe laat draai en jou bankbalans laat hoes, moet jy verbyhou. Soek jy ’n betroubare ryding wat iets van alles baie goed kan doen, is die ASX ’n uitstekende keuse.