KOM SAAM WOESTYN TOE!
Kom saam met en Bhejane 4x4 Adventures op ’n begeleide selfry-kamptoer deur die Kgalagadi-oorgrenspark en die Kalahari-woestyn.
Suid van Walvisbaai staan die afsondering heuphoogte. Op die week lange Namib100-staptog vergeet jy heeltemal van die ou wêreld en sy dinge – bespreek nou al jou plekkie vir volgende jaar!
DAG 1 Ons avontuur deur die Kalahari begin by die eerste kampplek – Twee-Rivieren in die Kgalagadioorgrenspark. ’n Laatmiddag-wildrit is opsioneel. Ná die lang rit kan jy in die swembad afkoel.
Die aand om die kampvuur kan almal mekaar beter leer ken terwyl ons weglê aan aandete wat deur ons bossjef voorberei is.
DAG 2 & 3 Ons mik vandag vir Nossob, waar ons die volgende twee aande bly. Langs die pad maak ons ’n draai by die Auchterlonie-museum waar jy meer oor die park se geskiedenis leer en ons vir middagete stop. Wanneer ons by die kamp aankom, staan ons tente en koffie en tee reeds vir ons en wag.
Die volgende dag begin met koffie en beskuit vroegoggend, waarna jy die kamp kan verken of ’n wildrit doen. By die watergat naby die kampplek hou ook dikwels mooi diere, as jy verkies om net hier te bly.
DAG 4 & 5 Ons staan vroeg op, eet ’n ligte ontbyt en mik dan noord oor die Nossobrivier tot in die Botswanadeel van die park.
Ons bestemming is die Kaa-hek. Dis ’n mooi rit deur duineveld. Ons eet middagete langs die pad. Ons verlaat die park deur die Kaa-hek en ry nou in gemeenskapskonsessiegebiede.
Ons reis die volgende twee dae deur een van die wildste en mees afgeleë plekke in Suider-Afrika.
Ons volg tweespoorpaaie deur die rooi Kalaharisand en grasveld.
Die gebied is bekend vir sy laagliggende panne waar elande, springbokke, gemsbokke en die ikoniese Kalahari-leeus hulle dors kom les. Ons beweeg in ’n deel waar die wild vrylik rondloop – ’n wildernisgebied meer as twee keer groter as die Krugerwildtuin. Die voertuie se spore is eintlik al bewys van mensgemaakte goed wat jy hier sal sien. Hier is ook min ligbesoedeling en die hemelruim en afgesonderdheid sal jou gou tot rus laat kom.
Ons kamp hierdie twee aande langs twee van die soutpanne.
DAG 6 & 7 Ons val weer vroeg in die pad en ry na die Botswana-dorpie Hukuntsi in die noordelike deel van die konsessiegebied, waar ons ons water- en brandstofvoorraad aanvul.
Ons ry dan weer suid, na Mabuasehube aan die Botswanakant van die Kgalagadi-oorgrenspark. Ons kampplek is op die rand van Mabua-pan.
Beleef onvergeetlike Kalahari-sonsondergange en kyk wild rondom die park. Leeus, luiperds, jagluiperds, ratels en bruinhiënas is algemeen in die gebied.
DAG 8 Ná ontbyt pak ons op en begin ons reis huis toe. Ons ry in konvooi tot by die dorpie Tshabong, waar ons moet groet. Van hier af is dit sowat 20 km op ’n teerpad tot by die grenspos en nog ’n verdere 215 km tot op Kuruman.