Suurroomdeeg

Maak 24 halfmaanpasteitjies Bereidingstyd 40 minute plus 30 minute rustyd

Jy benodig

• 3 koppies koekmeel •’n knippie sout

• 250 g koue botter

• 1 koppie suurroom

• 1 eier, geklits

• sap van 1 suurlemoen

Só maak jy

1 Meng die meel en sout in ’n groot mengbak. Rasper die botter met die growwe kant van die rasper by die meel in en vryf dit dan met jou vingerpunte totdat die mengsel soos growwe broodkrummels lyk.

2 Klits die suurroom, eier en suurlemoensap saam en meng dit by die bottermengsel in totdat die deeg bymekaarkom.

3 Keer die deeg op ’n meelbestrooide oppervlak uit en knie dit vinnig tot net-net glad. Vorm die deegbol in ’n plat skyf van 2 cm dik (dit maak later se uitrolwerk makliker), bedek dit met kleefplastiek en laat dit vir 30 minute in die yskas rus.

4 Voorverhit die oond tot 180 ºC.

Rol die deeg op ’n meelbestrooide oppervlak uit tot ’n dikte van

3-5 mm. Gebruik ’n ronde koekiedrukker met ’n deursnee van sowat 12 cm om sirkels uit die deeg te sny. (Of gebruik ’n groot glas of piering en ’n skerppuntmessie om die sirkels te trek en uit te sny.)

5 Verf die deegsirkels met geklitste eier en skep ’n lepel vol fyn wildsvleis bo-op elkeen. Vou elke sirkel in ’n halfmaan toe en druk die rand eers met jou vingerpunte en dan met die tande van ’n vurk deeglik vas om seker te maak die pasteitjie is geseël. Pak die pasteitjies op ’n gesmeerde bakplaat, verf die bokante met eier en bak dit vir 25-30 minute tot goudbruin.