Gerolde blouwildebeesfilet

Genoeg vir 6

Bereidingstyd 15 minute plus marineertyd oornag Gaarmaaktyd 15 minute

Jy benodig

• 1 blouwildebeesfilet van

ongeveer 1,8 kg

• 2 koppies karringmelk

• 3 eetlepels uiemarmelade • 200 g spekrepies, brosgebraai • 2 wiele fetakaas, gekrummel • 1 koppie babaspinasieblare,

geblansjeer

• 2 eetlepels olyfolie

• sout en varsgemaalde swartpeper na smaak

Só maak jy

1 Sit die filet in ’n groot glasbak met ’n deksel, giet die karringmelk oor tot die vleis bedek is, en laat die vleis oornag in die yskas marineer.

2 Haal die vleis ’n paar uur vóór jy vuurmaak uit die yskas sodat dit kamertemperatuur kan bereik. Haal dit uit die karringmelk en klad die meeste van die marinade weg. Vlek dan die filet in die lengte oop om ’n groot reghoek te kry wat sowat 2 cm dik is.

3 Smeer die hele oppervlak met die uiemarmelade en rangskik die bros spekrepe bo-op, gevolg deur ’n eweredige laag feta en laastens ’n laag spinasieblare. Rol nou die vleis styf op in ’n lang rol en bind dit stewig met ’n paar stukkies kombuistou toe. Geur dit oraloor met sout en peper.

4 Braai die vleis sowat 15 cm bo warm kole. (Ek sny gewoonlik die opgerolde filet middeldeur om dit vir hierdie stap meer hanteerbaar te maak.) Moenie die rol vir langer as 15 minute braai nie, maar moet ook nie die vleis te haastig omdraai nie – jy wil seker maak dit kry alkant ’n mooi goudbruin korsie. Laat die vleis rus, maar hou solank die vuur aan die gang. Toets ’n stukkie en kyk of dit gaar is na jou smaak. Onthou, wildsfilet moet liefs nie gaarder wees as mediumgaar nie.

Vir die sappigste resultaat wil jy die binnekant nog pienk hê.

5 Sny die vleis in dik skywe en sit dit voor saam met jou gunstelingbykos soos pampoentert.

WENK Jy kan ook die filet in ’n warm gietysterpan oor die kole seël en dit deurentyd met ’n mengsel van olyfolie en botter bedruip.