*REISPROGRAM
AANKOMS WALVISBAAI
Ons stel voor jy arriveer ’n dag voor die staptog in Walvisbaai, waar ’n verpligte inligtingsessie en ’n aandete by Lagoon Chalets gehou word.
DAG 1 21km
Die groep stappers sal met 4x4’s vervoer word tot by Modderbankies, waar die Kuisebrivier eeue gelede in die oseaan uitgemond het.
Die versteende modderwalle is vandag steeds sigbaar. Van hier stap jy strandlangs na Sandvishawe, waar water deur die duine filtreer word en in die strandmeer uitsyfer.
Hierdie mikroklimaat lok duisende voëls, en Sandvishawe is in 1995 tot ’n Ramsarbewaringsgebied verklaar.
Die dierespore hierlangs verseker jou julle is nie die enigste lewende wesens nie. Die laaste deel van die dag se stap kan of kuslangs of binnelands oor ’n klompie duine gedoen word voor jy jou kampplek vir die aand bereik.
DAG 2 25 km
Vandag stap jy verby kolonies robbe op pad na die Langewand, ’n deel van die kus waar die kusduine met hul voete in die see staan.
Hier kan jy die 15 km van die Langewand net met laagwater aandurf.
DAG 3 24 km
Op dié dag stap jy verby die wrak van die Shawnee, ’n vistreiler wat in 1976 hier gestrand het – soos menige ander skip aan die Namibiese kus. Hierna kies jy binneland toe koers, woestyn-in, totdat jy hoog bo-op ’n duin ’n skouspelagtige kampplek bereik.
DAG 4 20 km
Jy sien vandag ’n baie anderste deel van die Namib wanneer jy uit die duine stap tot op ’n gruisvlakte waar die kleiner diertjies soos die witdamespinnekop en vetplantjies jou aandag trek. Die interessante geologie van die gebied word weerspieël deur die wit kwartsstrepe op die grond wat deur swart lawavelde afgewissel word.
Dis hier waar diamantmyners deur die gruis na blink klippies gesoek het, en waar toegang só beperk was dat dit tot ’n Sperrgebiet verklaar is. Vanaand kamp jy langs ’n verlate mynnedersetting waar die geboue lankal toegewaai is onder woestynsand.
DAG 5 11 km
Nou mik jy weer kus toe, oor pienk soutpanne en ’n oeroue seebodem wat besaai lê met skulpe. In die verte gewaar jy af en toe die wrak van die Eduard Bohlen, wat stadig al groter in jou gesigsveld word. Die staptog eindig by die wrak – en word gevier met ’n glas vonkelwyn en groot glimlagte. Daar wag wel steeds nog ’n bietjie pret aangesien jy in ’n 4x4 oor van die wêreld se hoogste duine na jou laaste kampplek vervoer word.
DAG 6 Vaarwel!
Ná ontbyt word jou groep na Walvisbaai teruggeneem.
DIE SPAN
Ons ondersteuningspan is almal hoogs opgeleide gidse wat in 4x4’s alle kos en kamptoerusting vervoer en seker maak dat jy die Eduard Bohlen veilig bereik. (Bagasie word beperk tot een sak per persoon).
Daar is ’n warm stort en ’n chemiese toilet by elke aand se kampplek. Aandete en ontbyt word voorsien, asook ’n middagete vir die dag se stap. ’n Satellietfoon is beskikbaar vir noodgevalle.
DATUMS
• 25 Februarie-2 Maart 2021
• 10-15 April 2021
• 7-12 Augustus 2021
• 7-12 September 2021
• 5-10 November 2021
• 5-10 Desember 2021
AANTAL STAPPERS
Altesame 18-24 stappers, of jy kan ’n privaatgroep bymekaar kry.
AFSTAND
100 km oor 5 dae en 6 nagte
KOSTE
R18 900 p.p.
INGESLUIT
• Drie maaltye per dag
• Parktariewe, gemeenskapsheffings en konsessietariewe
• Beperkte bier en wyn saans by die kampplekke
• Drinkwater: 5 liter p.p.p.d.
• Stortwater: 5 liter p.p.p.d.
• Vervoer
• Ondersteuningspan in 4x4-voertuie en vyf gidse
UITGESLUIT
• Vervoer na en van Walvisbaai
• Reisversekering – dit moet binne 48 uur van jou eerste paaiement vir die staptog aangeskaf word; en dit moet ekstreme sport en lugontruiming insluit
• Peuselgoed en drankies
• Kamptoerusting en slaapsakke
• Aandete en alle drankies by Lagoon Chalets die aand voor die staptog
• Vervoer na en van Lagoon Chalets voor die staptog
MEDIESE KLARING EN VRYWARING
Stappers moet mediese klaring hê. Die staptog is nie moeilik nie, maar dis relatief lang afstande wat afgelê word. Uithouvermoë is belangrik.
’n Vrywaringsvorm moet deur ’n mediese dokter ingevul word.